मुंबई : दादर पश्चिम येथे एका भरधाव मोटरीने झाडाला धडक दिली. या अपघातात मोटारीतील दोघांचा मृत्यू झाला, तर दोघे गंभीर जखमी झाले आहे.या प्रकरणी चालक सुदर्शन झिंजुरटे विरोधात दादर पोलीस ठाण्यात गुन्हा दाखल करण्यात आला आहे. ही घटना शुक्रवारी रात्री घडली.

या दुर्घटनेत सुनील दत्तवानी आणि सतीश यादव यांचा मृत्यू झाला. तर केविन पिल्लई आणि साद इक्बाल अन्सारी गंभीर जखमी झाले आहेत. या दुर्घटनेत चालकसुद्धा जखमी झालं असून त्याच्यावर केइएम रुग्णालयात उपचार सुरु आहेत.आरोपी चालक मद्याच्या अमलाखाली होता का, याबाबत वैद्यकीय अहवालानंतर स्पष्टता येणार आहे.

दुर्घटनेतनंतर जखमी झालेले साद अन्सारी हे हिंदूजा रुग्णालयात उपचार घेत आहेत, तर पिल्लई गंभीर जखमी असून त्याच्यावर वांद्रे येथील होली फॅमिली रुग्णालयात अतिदक्षता विभागात उपचार सुरू आहेत. त्यांचा पाचवा मित्र आणि मोटार चालक सुदर्शन झिंजुरटे जखमी असून त्यांच्यावर केईएम रुग्णालयात उपचार सुरू आहे.

पोलिसांनी दिलेल्या माहितीनुसार, पाचही मित्र लोअर परळ येथील एका पबमध्ये गेले होते. तेथे मित्रांसोबत वेळ घालवल्यानंतर रात्री झिंजुरटे त्यांच्या मोटारीतून मित्रांसोबत घरी निघाले होते. रात्री 2 वाजयच्या सुमारास चालकाचा गाडीवर ताबा सुटल्यामुळे अपघात झाल्याचे तपासात समोर आले आहे. चालक मद्य प्राशन करून गाडी चालवत असल्याचा संशय असून वैद्यकीय चाचणीनंतर ते स्पष्ट होईल.