मुंबई- शिवाजी पार्क मैदानासाठी ठाकरे गटाकडून महानगरपालिकेकडे अर्ज करण्यात आला आहे. एक महिन्यांपूर्वीच हा अर्ज करण्यात आल्याचं सांगण्यात आलंय. एकनाथ शिंदे गटानेही शिवाजी पार्क मैदानासाठी अर्ज केलाय. दोन्ही गटाचे अर्ज आल्याने महानगरपालिका प्रशासन सावध आहे. ( Dasara Melava in shivaji park dadar shivsena)

दादर येथे छत्रपती शिवाजी पार्क मैदानावर स्थापनेपासून शिवसेना दसरा मेळावा घेत आली आहे. शिवसेनेत दोन गट पडलेले आहेत. त्यामुळे दोन्ही पक्षांकडून हे मैदान मिळावे यासाठी एक महिन्यांपूर्वी अर्ज करण्यात आलाय. त्यामुळे कोणाला परवानगी द्यावी याबाबत महापालिकेसमोर पेच निर्माण झाला आहे. अद्याप महानगरपालिकेने कोणालाही परवानगी दिली नाही.

मागील वर्षीही असाच वाद निर्माण झाला होता. शिवाजी पार्कवर मेळावा कोण घेणार असा पेच निर्माण झाला. हा वाद न्यायालयात गेला. त्यावेळी शिवसेना कोणाची याबाबत निर्णय झालेला नव्हता. त्यामुळे उद्धव बाळासाहेब ठाकरेंच्या शिवसेनेला शिवाजी पार्कवर दसरा मेळावा घेण्याची परवानगी मिळाली. यावेळी एकनाथ शिंदे यांच्याकडे पक्ष आणि चिन्ह आहे. त्यामुळे नेमका काय निर्णय प्रशासन घेत हे पाहावं लागेल.

माहितीनुसार, महानगरपालिकेने विधी विभागाकडून अभिप्राय मागितला आहे. त्यामुळे यावेळी कोणाला शिवाजी पार्कवर मेळावा घेण्यासाठी परवानगी मिळते हे पाहावं लागणार आहे. मागच्या वर्षी शिंदे गटाकडून वांद्रे कुर्ला संकुलातील एमएमआरडीए संकुलात मेळावा घेण्यात आला होता. दोन्ही पक्षांकडून अर्ज प्राप्त झाल्याने आता विधी विभागाच्या निर्णयाकडे लक्ष असणार आहे. (Latest Marathi News)