मुंबई : प्रसिद्ध उद्योगपती मुकेश अंबानी आणि त्यांच्या कुटुंबियांना फोनवरुन जीवे मारण्याची धमकी दिल्याबद्दल एकाला दहिसर इथून पोलिसांनी अटक केली आहे. मुंबईतील रिलायन्स फाऊंडेशन हॉस्पिटलला सोमवारी ८ फोन कॉल्स आले होते, यातून ही धमकी देण्यात आली होती. (Death threat to Mukesh Ambani Suspect detained in Mumbai Dahisar)

रिलायन्स फाउंडेशनच्या रुग्णालयाच्या हेल्पलाईन क्रमांकावर सोमवारी सकाळी साडे दहा वाजण्याच्या सुमारास अनेकदा फोन आला यातून मुकेश अंबानी आणि त्यांच्या कुटुंबियांना जीवेमारण्याची धमकी देण्यात आली होती. हा प्रकार गांभीर्यानं घेत पोलिसांनी तपास सुरु केला. दरम्यान, एका संशयीत व्यक्तीला पोलिसांनी दहिसर इथून ताब्यात घेतलं असून याप्रकरणी गुन्हा दाखल करण्याची प्रक्रिया सुरु असल्याचं वरिष्ठ आयपीएस अधिकाऱ्यांनी सांगितलं.

दरम्यान, यापूर्वी फेब्रुवारी २०२१ मध्ये अंबानी यांच्या अँटिलिया या निवासस्थानाबाहेर एक स्कॉर्पिओ आढळून आली होती. यामध्ये स्फोटकं आढळून आली होती. या स्कॉर्पिओ गाडीचे मालक मनसुख हिरेन होते. या घटनेनंतर हिरेन यांची हत्या झाल्याचं उघड झालं होतं. याप्रकरानंतर या प्रकरणाचा तपास एनआयएकडं देण्यात आला होता. यानंतर या प्रकरणात सचिन वाझे, सुनील माने आणि एन्काऊंटर स्पेशालिस्ट प्रदीप शर्मा यांना अटक झाली होती.