- नितीन बिनेकर

मुंबई : गेली ६० वर्षांहून अधिक काळ प्रवासी फेरी बोटीतून शेकडो नोकरदार आणि पर्यटक आपली दुचाकी घेऊन जात येत असतात. मात्र, काही दिवसांपूर्वी सागरी महामंडळाने अचानक नोकरदार- पर्यटकांना आपली दुचाकी फेरी बोटीतून घेऊन जाण्यास बंदी घातली आहे.

परिणामी फेरी बोट चालकांचे मोठे नुकसान होत आहे. त्यामुळे आता सागरी महामंडळा एकतर्फी घेतलेल्या निर्णयाविरुद्ध येत्या शनिवारपासून भाऊचा धक्का ते रेवस दरम्यानची फेरी बोट बंद करण्याचा निर्णय घेतला आहे.

गेली अनेक वर्षांपासून भाऊचा धक्का येथुन रेवस, करंजापर्यत फेरी बोटी चालत आहे. भाऊचा धक्का ते रेवस या समुद्र वाहतुकी दरम्यान, दररोज शेकडो नोकरदार आणि पर्यटक ये-जा करतात.

काही दिवसांपूर्वी महाराष्ट्र मेरीटाईम बोर्डाने पर्यटक व नोकरदार वर्गाला , फेरी बोटीतून आपली दुचाकी वाहनाना, घेऊन जाण्यास बंदी घालण्यात आली आहे. या निर्णयामुळे पर्यटक व नोकरदार वर्गामध्ये तीव्र नाराजी व्यक्त झाली असून, त्यांनी या एकतर्फी निर्णयाचा निषेध नोंदविला आहे.

भाऊचा धक्का ते रेवस आणि रेवस ते भाऊचा धक्का हा जलप्रवास, जलद व प्रदुषण मुक्त आहे. या वाहतुकीच्या दरम्यान, दररोज, पर्यटक हे फेरी बोटीमधून दुचाकी वाहने घेऊन मुंबईकडे आणि अलिबाग कडे जात-येत असतात. गेली 60 वर्षे पर्यटकांच्या सोयीसाठी दुचाकी वाहने फेरी बोटीतून घेऊन जात आहे. परंतु, अचानकपणे सुरक्षेचे कारण देत दुचाकी वाहतुकीला बंद करण्याचा निर्णय, महाराष्ट्र मेरीटाइम बोडाने घेतला आहे.

गैरसोयीसाठी महामंडळ दोषी-

भाऊचा धक्का ते रेवस (अलिबाग) फेरी बोट बंद झाल्यास, अलिबाग येथे जाणारे येणारे पर्यटक आणि नोकरदार वर्ग यांना अतोनात त्रास होणार आहे. याची जबाबदारी महाराष्ट्र मेरीटाईम बोर्ड असणार आहे. महाराष्ट्र मेरीटाईम बोर्डाने आपला निर्णय मागे घ्यावा, अन्यथा आम्हाला भाऊचा धक्का ते रेवस (अलिबाग) आणि रेवस ते भाऊचा धक्का ही फेरी बोट सेवा कायमची बंद करावी लागणार असा इशारा मुंबई जलवाहतुक व औद्योगिक सहकारी संस्थेकडून देण्यात आलेला आहे.

तोपर्यंत दुचाकीवर बंदीच-

मुंबईतील भाऊचा धक्का ते रेवस, उरण, मोरा आणि गेट वे ऑफ इंडिया ते मांडवा जलमार्गावर २०० पेक्षा जास्त फेरी बोटी चालतात. प्रवासी अनेक वर्षांपासून दुचाकी वाहने फेरी बोटीतून घेऊन जात होते. फेरी बोटीतील सुरक्षेच्या उपाययोजनेची माहिती देत नाही तोपर्यंत दुचाकी नेण्यावर बंदी असणार असल्याची माहिती सागरी महामंडळाने दिली.

काय म्हणते सागरी महामंडळ ?

सागरी महामंडळाचे मुख्य कार्यकारी अधिकारी डॉ. अमित सैनी यांनी सकाळला सागितले की, फेरी बोटीतून दुचाकी वाहन घेऊन जाण्यास आम्ही कायमची बंदी घातलेली नाही. बोटीत वाहन कसे ठेवायचे, त्यांची संख्या किती हवी आणि त्यात पेट्रोल असल्याने सुरक्षेचा दृष्टिकोनातून काय उपाययोजना केल्या त्याबाबत आम्ही मालकांकडून बोटीचा सुरक्षेचा दृष्टिकोनातून आराखडा सादर करण्यास सांगितले आहे.