उल्हासनगर : संचारबंदीच्या कठीण काळात एका गर्भवती महिलेला दोनदा हाकलून देण्याचा प्रकार उल्हासनगरातील शासकीय मध्यवर्ती रुग्णालयात घडला होता. दरम्यान आणखी एक असाच धक्कादायक प्रकार समोर आला असून महिलेला प्रसूतीसाठी डॉक्टर नसल्याचे कारण सांगून कळवा रुग्णालयात जाण्यास सांगितले. तेथूनही परत पाठवल्याने या महिलेची चक्क धावत्या प्रवासात रुग्णवाहिकेतच डिलिव्हरी झाली.

मुंबईतील महत्वाच्या बातम्या वाचण्यासाठी येथे क्लिक करा

राधिका संदीप राक्षे (20) असे संबधित महिलेचे नाव असून ती सी.ब्लॉक परिसरात तिच्या कुटुंबियांसह राहते. दरम्यान शुक्रवारी (ता.24) तिला प्रसुतीकळा सुरु झाल्यावर तिचा पती संदीपने तिला शासकीय मध्यवर्ती रुग्णालयात नेले. ‘’रुग्णालयात डॉक्टर्स नाहीत, तुम्ही कळवा शासकीय रुग्णालयात जा‘’ असे धक्कादायक उत्तर त्यांना मिळाले. त्यानंतर राधिकाला रुग्णवाहिकेतून कळवा रुग्णालयात नेले. पण हे रुग्णालय कोविड-19 करण्यात आले असून इथे कोरोना बाधित रुग्ण आहेत असे स्पष्टीकरण देऊन त्यांना पुन्हा उल्हासनगरातच जाण्यास सांगण्यात आले. तोवर राधिकाच्या कळा प्रचंड वाढल्या व परतीच्या प्रवासातच तिने एका गोंडस बाळाला चालू गाडीतच जन्म दिला. 

त्यानंतर रुग्णवाहिका उल्हासनगरातील शासकीय रुग्णालयात आल्यावर मात्र डॉक्टरांनी तिला दाखल करून घेण्यास तत्परता दाखवली. 3 दिवसांपूर्वी रुबिना या गर्भवती महिलेला दोनदा हाकलून देणाऱ्या डॉक्टरांचा प्रकार चव्हाट्यावर आणणारे अशोका फाउंडेशनचे सर्वेसर्वा शिवाजी रगडे यांनीच हा प्रकारही समाज माध्यमांवर व्हायरल केला आहे. रगडे यांनी जिल्हा शल्यचिकित्सक डॉ.सुधाकर शिंदे यांची भेट घेऊन संचारबंदीच्या काळात गर्भवती महिलांना योग्य ती वागणूक द्या अन्यथा एखाद्या महिलेचा जीव जाऊ शकतो, अशी विनंती पूर्वक मागणी केली आहे.

अधिक आणि सविस्तर बातम्या वाचण्यासाठी ईपेपर वाचा
 

या संपूर्ण प्रकरणाची चौकशी सुरू आहे. तसेच राधिका व तिचे बाळ दोघेही व्यवस्थित असून त्यांची प्रकृती उत्तम आहे. - डॉ. सुधाकर शिंदे, शल्यचिकित्सक, शासकीय मध्यवर्ती रुग्णालय, उल्हासनगर