मुंबई: महाराष्ट्राचे माजी मुख्यमंत्री आणि विधानसभेचे विरोधी पक्षनेते देवेंद्र फडणवीस यांनी आज कोरोना प्रतिबंधक लसीचा पहिला डोस घेतला. ५० वर्षीय फडणवीसांनी मुंबईच्या जे जे रूग्णालयात लस टोचून घेतली. आपल्या अधिकृत ट्वीटर अकाऊंटवरून त्यांनी या संबंधीची माहिती दिली. "मी कोरोना प्रतिबंधक लसीचा पहिला डोस आज मुंबईच्या जे जे रूग्णालयामध्ये घेतला. माझी प्रकृती अत्यंत ठणठणीत आहे", असं ट्वीट त्यांनी केलं. "हे वॅक्सिन पूर्णतः सुरक्षित असून सर्व पात्र व्यक्तींनी लस अवश्य घ्यावी ही माझी सर्वांना विनंती आहे.", असं आवाहनदेखील त्यांनी केलं.

विधान परिषदेचे विरोधी पक्षनेते प्रवीण दरेकर यांनीही जे जे रुग्णालयात जाऊन कोरोना प्रतिबंधक लसीचा पहिला डोस घेतला. लसीकरणाची ही प्रक्रिया खूप सोपी असून जे नागरिक पात्र आहेत त्यांनी न घाबरता लस घ्यावी, अशी विनंती विरोधी पक्षनेते प्रवीण दरेकर यांनी केली.

सीरम इन्स्टीट्यूटची कोविशिल्ड आणि भारत बायोटेकची कोव्हॅक्सिन या दोन लसींना सध्या भारतात परवानगी देण्यात आली आहे. केंद्रीय आरोग्यमंत्री हर्ष वर्धन यांनी शुक्रवारी सांगितलं की येत्या काही दिवसांमध्ये भारतातील लसीकरणाची मोहीम आणखी व्यापक केली जाईल. लसीकरणाबाबत शक्य तितकी जागरूकता निर्माण केली जाईल, जेणेकरून कोणत्याही लसीसंदर्भात कोणाच्याही मनात शंका राहणार नाही.

मुंबईतील ताज्या घडामोडी जाणून घेण्यासाठी येथे क्लिक करा

महाराष्ट्रात सध्या अनेक ठिकाणी लसीकरण मोहिम हाती घेण्यात आली आहे. ज्येष्ठ नागरिक आणि कोरोना योद्ध्यांना लसीकरणाचे पहिले डोस दिले जात आहेत. त्याशिवाय, राजकीय नेतेमंडळींनीदेखील लसीचा पहिला डोस घेतला आहे. काही दिवसांपूर्वीच मुख्यमंत्री उद्धव ठाकरे यांनी लस टोचून घेतली. याशिवाय, भाजपचे प्रदेशाध्यक्ष चंद्रकांत पाटील, रिपाईंचे रामदास आठवले यांनीही लस घेतली.