मुंबई : ‘सक्तवसुली संचालनालय (ईडी) तसेच प्राप्तिकर खात्याची कारवाई होईल, या भीतीने आमचे आमदार भाजपत गेले’ या ज्येष्ठ नेते शरद पवार यांच्या वक्तव्यावर उपमुख्यमंत्री देवेंद्र फडणवीस यांनी २०१९ मध्ये आम्हाला पाठिंबा देऊ केला होतात, तो कोणत्या कारणामुळे, असा सवाल केला आहे.

‘पवारसाहेब कोणत्या कारवाईला घाबरून येत होते, हे त्यांनीच सांगावे’, असा प्रश्नही फडणवीस यांनी केला. ते म्हणाले, की २०१९ मध्ये भाजप-शिवसेनेचे सरकार गेल्यानंतर राष्ट्रवादी काँग्रेसचा प्रमुख या नात्याने पवारसाहेबांनी आम्हाला पाठिंबा दिला होता, तो कोणत्या कारवाईच्या भीतीमुळे? २०१९ च्या आधी २०१७ मध्येही पवारांनी भाजपला पाठिंबा देऊ केला होता. तेव्हा कोणत्या कारवाईची भीती होती?

फडणवीस खोटारडे नेते

देवेंद्र फडणवीस हे खोटारडे नेते आहेत अशी टीका ठाकरे गटाचे प्रवक्ते संजय राऊत यांनी केला आहे. दिल्लीतील राजकारणाचे ते बळी ठरताहेत, याचे वाईट वाटते असेही राऊत म्हणाले. भाजपने हा आरोप खोडून काढला आहे. फडणवीस हे चोरांना ठिकाणावर आणणारे नेते आहेत, असे माजी मंत्री सदाभाऊ खोत यांनी नमूद केले.