मुंबई: राज्यात गाजत असलेल्या परमबीर सिंह विरूद्ध अनिल देशमुख या प्रकरणात अखेर आज राज्याचे गृहमंत्री अनिल देशमुख यांनी राजीनामा दिला. मुंबईचे माजी पोलीस आयुक्त परमबीर सिंह यांनी राज्याचे गृहमंत्री अनिल देशमुख यांच्यावर १०० कोटींच्या भ्रष्टाचाराचे आरोप लावले होते. या आरोपांवरून आज उच्च न्यायालयाने गृहमंत्र्यांच्या सीबीआय चौकशीचे आदेश दिले. या आदेशानंतर गृहमंत्री अनिल देशमुख यांनी मुख्यमंत्र्यांकडे आपला राजीनामा सुपूर्द केला. त्यानंतर राज्याचे नवे गृहमंत्री कोण असा सवाल उपस्थित झाला होता. त्या प्रश्नाचं उत्तर अखेर मिळालं.  गृहमंत्री अनिल देशमुख यांचा राजीनामा स्वीकारावा आणि त्याजागी गृह विभागाचा कार्यभार राष्ट्रवादीचे दिलीप वळसे पाटील यांच्याकडे देण्यात यावा, असं पत्र मुख्यमंत्री उद्धव ठाकरे यांनी राज्यपालांना पाठवलं आहे.

दिलीप वळसे पाटील यांच्याकडे सध्या कामगार विभागाचा कार्यभार आहे. तो अतिरिक्त कार्यभार आता हसन मुश्रीफ यांच्याकडे सोपवण्यात यावा तसेच राज्य उत्पादन शुल्क विभागाचा अतिरिक्त कार्यभार हा उपमुख्यमंत्री आणि वित्तमंत्री असलेले अजित पवार यांच्याकडे देण्यात यावा अशी विनंतीदेखील पत्रात करण्यात आली आहे.