मुंबई : भारतात १०० पंचतारांकित हॉटेल (Hundred five star hotels) मालकीची असलेला अग्रगण्य ग्रूप आयटीसी हॉटेल (ITC Hotel), सीआयआय उद्योग संघटना व आदरातिथ्य क्षेत्रातील स्वीत्झरलँडचे (Switzerland) अग्रगण्य विद्यापीठ ईएचएल (EHL) यांच्यातर्फे भारतातील तरुणांसाठी आदरातिथ्य क्षेत्रातील दीड वर्षांच्या डिप्लोमाची घोषणा आज येथे करण्यात आली.

आयटीसीचे वरिष्ठ अधिकारी निलेश मित्रा, अतुल भल्ला, सीआयआय चे सौगता रॉयचौधरी आणि ईएचएल चे प्रवीण रॉय व अमन सचदेव यांनी आज परळच्या आयटीसी ग्रँड सेंट्रल पंचतारांकित हॉटेलात पत्रकारांना ही माहिती दिली. या अभ्यासक्रमात विद्यार्थ्यांना आयटीसीच्या हॉटेलांमध्ये प्रत्यक्ष प्रशिक्षण दिले जाईल. हा अभ्यासक्रम ईएचएल मार्फत तज्ञांकडून शिकविला जाईल व त्यासाठीचे विद्यार्थी सीआयआय निवडेल. प्रशिक्षणानंतर त्यांना सीआयआय तर्फे नोकऱ्याही दिल्या जातील, त्यांना आयटीसी च्या हॉटेलांमध्ये किंवा अन्यत्र कोठेही नोकऱ्या मिळतील, असे निलेश मित्रा म्हणाले.

इंग्रजीतील चांगल्या गुणांसह बारावी उत्तीर्ण ही या अभ्यासक्रमाची पात्रता आहे, त्यांची मुलाखत घेऊन निवड केली जाईल. प्रथम मुंबई, दिल्ली, चेन्नई व कोलकाटा येथील आयटीसी च्या पाच हॉटेलांमध्ये २०० विद्यार्थ्यांना हे प्रशिक्षण दिले जाईल. तीन वर्षांत विविध तुकड्यांमधून किमान दहा हजार तरुणांना कौशल्य प्रशिक्षण दिले जाईल. याचे शुल्क सीआयआय कडे भरावयाचे असून ते अन्य व्यावसायिक महाविद्यालयांच्या तुलनेत अत्यंत कमी असल्याचेही भल्ला म्हणाले.

प्रवास-पर्यटन-आदरातिथ्य क्षेत्र

सन २०२८ ची परिस्थिती

जगात निर्माण होणाऱ्या नोकऱ्या - ४० कोटी

भारतातील कुशल तरुणांची गरज ५.३० कोटी

भारतातील सर्वात मोठे सेवाक्षेत्र होणार

जीडीपी मध्ये दहा टक्के वाटा राहणार