मुंबई - महाविकास आघाडीतील जागावाटपाची घोषणा झाल्यानंतर सांगली, भिवंडी आणि दक्षिण मध्य मुंबई या जागा शिवसेना उद्धव बाळासाहेब ठाकरे पक्ष आणि राष्ट्रवादी काँग्रेस शरदचंद्र पवार पक्षाकडे गेल्यानंतर काँग्रेस पदाधिकाऱ्यांची नाराजी उघड होत आहे. मुंबई काँग्रेसच्या आज आयोजिण्यात आलेल्या बैठकीत याचे प्रत्यंतर आले. मुंबई काँग्रेसच्या अध्यक्षा वर्षा गायकवाड यांनीच बैठकीला दांडी मारल्यामुळे ही बैठक रद्द करण्यात आली.

मुंबईत सन्मानजनक जागावाटप होणे गरजेचे होते; परंतु उद्धव ठाकरे यांच्या पक्षाने मुंबईतील चार जागांवर परस्पर उमेदवार जाहीर केले, अशी काँग्रेसच्या मुंबईतील नेत्यांची नाराजी आहे. त्यातही, ज्या दक्षिण मध्य मुंबईच्या जागेवर एकेकाळी काँग्रेसचे एकनाथ गायकवाड विजयी झाले होते, त्या जागेवर अनिल देसाई यांना उमेदवारी दिली. त्यामुळे काँग्रेसचे पदाधिकारी नाराज झाले.

ही जागा आपल्याला मिळावी असा आग्रह वर्षा गायकवाडांसह काँग्रेस कार्यकर्त्यांनी धरला आहे. त्यामुळे वर्षा गायकवाड यांनी नाराजी थेट दिल्लीला फोन करून कळवली असल्याचे समजते. दरम्यान, मुंबई काँग्रेसची आज होणारी बैठक ही एक दिवसासाठी पुढे ढकलली आहे. असल्याचे सांगण्यात येत आहे. ही बैठक उद्या (ता. ११) होणार आहे.

काँग्रेसची अवहेलना झाल्याचा सूर

मुंबईतील लोकसभेच्या सहा जागांपैकी केवळ दोनच जागा काँग्रेसच्या वाट्याला आल्या आहेत. त्यातही दक्षिण मध्य मुंबईची जागा ठाकरे यांच्या पक्षाच्या वाट्याला गेली आहे. ‘मविआ’तील जागावाटपानंतर ही नाराजी उफाळून आली. ‘मविआ’त काँग्रेसची अवहेलना केली जात असल्याचा सूर कार्यकर्त्यांमध्ये असल्याचे सूत्रांनी सांगितले. दुसरीकडे, सांगलीची जागा न मिळाल्याने नाराज झालेल्या विश्‍वजित कदम आणि विशाल पाटील यांनीही आज पत्रकार परिषद घेत या जागावाटपाचा फेरविचार करण्याची मागणी केली.