डोंबिवली - बांधकाम साहित्य पुरविणे, त्याचा आर्थिक व्यवहार यावरून वाद झाल्याने पुरवठादार व त्याच्या साथीदारांनी ठेकेदार व कामगार यांना हॉकी स्टिकने बेदम मारहाण केल्याची घटना टिटवाळा परिसरात घडली आहे. याप्रकरणी टिटवाळा पोलीस ठाण्यात पुरवठादार संदीप तरे व त्याचे 10 साथीदार यांच्या विरोधात गुन्हा दाखल करण्यात आला आहे.

टिटवाळा येथील म्हसकळ गावात मंगळवारी ही मारहाणीची घटना घडली आहे. येथे कलश दर्शन गृह प्रकल्प उभारणीचे काम सुरू आहे. या गृह प्रकल्पासाठी बांधकाम साहित्य पुरविण्याचे काम करण्यासाठी येथील ठेकेदाराने स्थानिक रहिवासी म्हणून संदीप तरे यांना बांधकाम साहित्य पुरविण्याचे काम दिले आहे. तरे हे शिवसेना शिंदे गटाचे टिटवाळा उपविभाग प्रमुख असल्याची माहिती मिळत आहे.

बांधकाम साहित्य पुरवण्यातील आर्थिक व्यवहारातून तरे आणि विकासकाचा ठेकेदार यांच्यात धुसफूस सुरू होती. ही धुसफूस वाढल्याने मंगळवारी पुरवठादार संदीप तरे आणि त्यांच्या 10 समर्थकांनी म्हसकळ येथील कलश दर्शन प्रकल्पाच्या ठिकाणी जाऊन तेथील ठेकेदार आणि कामगारांना हॉकी स्टीकने बेदम मारहाण केली. या मारहाणीत ठेकेदारासह कामगार गंभीर जखमी झाले. या मारहाणीनंतर हल्लेखोर तेथून पळून गेले.

या प्रकल्पावरील ठेकेदाराच्या तक्रारीवरुन पोलिसांनी संदीप तरे यांच्यासह 10 जणांच्या विरुध्द गुन्हा दाखल केला आहे. हल्लेखोरांचा टिटवाळा पोलीस ठाण्याचे वरिष्ठ पोलीस निरीक्षक जितेंद्र ठाकूर आणि त्यांचे पथक शोध घेत आहे.