डोंबिवली - मानपाडा रोडवरील मूकांबिका हॉटेलमध्ये 15 ते 20 जणांच्या टोळके शनिवारी मध्यरात्री घुसले. त्यांनी हॉटेलची तोडफोड करत कोणताही पुरावा मागे राहू नये म्हणून सीसीटीव्ही डीव्हीआरच्या वायर देखील तोडून टाकल्या आहेत. तसेच हॉटेलचे मालक दयांनद शेट्टी आणि एका कर्मचाऱ्याला जबर मारहाण करत 1 लाखाची रोकड व सोन्याची अंगठी चोरुन नेली असल्याचे हॉटेल मालकाचे म्हणने आहे. याप्रकरणी रविवारी डोंबिवलीतील हॉटेल व्यावसायिक मानपाडा पोलीस ठाण्यात जमले असून पोलिसांनी गुन्हा दाखल करण्याची प्रक्रिया सुरू केली आहे.

डोंबिवली पूर्वेतील मानपाडा रोडवर शारदा मुकांबिका हॉटेल आहे. शनिवारी मध्यरात्री एका टोळक्याने हॉटेल मध्ये घुसून धिंगाणा घातला. यावेळी त्यांनी सीसीटीव्ही कॅमेरा, हॉटेल मधील टेबल खुर्च्यांची तोडफोड केली. डीव्हीआरच्या वायर तोडून हॉटेलचे मालक दयांनद शेट्टी आणि एका कर्मचाऱ्याला जबर मारहाण करत त्यांच्याकडील 1 लाखाची रोकड आणि अंगठी चोरी केली असल्याचे हॉटेल मालक सांगत आहेत. या मारहाणीत हॉटेल मालक दयानंद यांच्या डोक्याला दुखापत झाली आहे. तसेच इतर मार देखील लागला असल्याने उपचारासाठी त्यांना डोंबिवलीतील खाजगी रुग्णालयात दाखल करण्यात आले आहे. दरम्यान या घटनेनंतर डोंबिवलीतील हॉटेल मालक मानपाडा पोलीस स्थानकात जमले आहेत. मानपाडा पोलिसांनी गुन्हा दाखल करण्याची प्रक्रिया सुरू केली असल्याचे पोलिसांनी सांगितले.