डोंबिवली - ठाकुर्ली रेल्वे स्थानक परिसरात सरकते जिने बसविण्यात आले असून गुरुवारी ते प्रवाशांच्या सोयीसाठी सुरू करण्यात आले. मात्र शुक्रवारी सकाळी तांत्रिक बिघाड झाल्याने हा जिना बंद पडला आणि यावरून शिवसेना शिंदे गट व मनसे या दोन्ही पक्षाचे डोंबिवली शहर प्रमुख आपापसात भिडल्याचे पहायला मिळाले.

शिवसेनेने या कामाचा लोकार्पण सोहळा केला व दुसऱ्याच दिवशी जिना बंद पडल्याने मनसेने त्यांना टार्गेट केले. मनसे शहर प्रमुखांनी आपल्या उत्साही पदाधिकाऱ्यांना आवरा असे म्हणत थेट खासदार डॉ. श्रीकांत शिंदे देखील फार वेगाने धावत असल्याचे म्हटले आहे. यावर शिंदे गटाचे शहर प्रमुख यांनी मनसेला उशिरा का होईना समजले खासदार शिंदे हे काम करतात अस म्हणत आपल्या खुमासदार शैलीत उत्तर दिले आहे.

ठाकुर्ली रेल्वे स्थानकातील सरकते जिने हे उद्घाटनाच्या दुसऱ्याच दिवशी सकाळी बंद झाल्याने प्रवाशांची गैरसोय झाली. यावर जागरूक नागरिक कौस्तुभ देशपांडे, मंदार अभ्यंकर या दक्ष प्रवाशांनी त्यासंदर्भात ट्विट करून रेल्वेला तक्रार करत नाराजी व्यक्त केली आहे.

या जिन्याचे लोकार्पण शिवसेना शिंदे गटाचे डोंबिवली शहर प्रमुख राजेश मोरे यांच्या हस्ते गुरुवारी सकाळी करण्यात आले होते. यावरून मनसेने त्यांना टार्गेट केले. शुक्रवारी सकाळी मनसेचे डोंबिवली शहर अध्यक्ष मनोज घरत, संदीप म्हात्रे, प्रतीक देशपांडे, मनोज चौधरी यांसह अनेक पदाधिकारी यांनी सरकते जिने याची पाहणी केली.

दरम्यान शहर अध्यक्ष मनोज घरत यांनी शिंदे गटावर निशाणा साधला. ते म्हणाले, एका पक्षाच्या गटाने हे काम पूर्ण होण्याआधीच ती सेवा सुरू करण्याचा काल प्रयत्न केला ठाकुरली येथील एक्सीलेटर सध्या बंद आहे तसेच डोंबिवली व दिवा स्थानकातील एक्सीलेटर देखील बंद चालू बंद चालू अशा अवस्थेत असतात.

ही जेवढी रेल्वे स्थानक आहेत ती कल्याण लोकसभा मतदार संघाचे खासदार डॉक्टर श्रीकांत शिंदे यांच्या क्षेत्रात येतात मनसेचे आमदार राजू पाटील हे येथील कामांचा आढावा घेत असल्यामुळे खासदार शिंदे हे फार वेगाने धावत आहेत. कामाचा सपाटा लावल्याचे ते दाखवतात परंतु पुढे जात असताना मागे काय राहिले हे ते पाहत नाहीत.

त्यामुळे मनसेची विनंती आहे की जो काही पाठपुरावा करता, निधी आणता त्याचा विनियोग योग्य होत आहे की नाही हेही पहा. आपल्या अति उत्साही पदाधिकाऱ्यांना आवरा. काम पूर्ण झाल्याशिवाय त्याच लोकार्पण होऊ देऊ नका असा टोला त्यांनी हाणला.

यावर शिवसेना शिंदे गटाचे डोंबिवली शहर प्रमुख राजेश मोरे यांनी आपल्या खुमासदार शैलीत घरत यांना उत्तर दिले आहे. मोरे म्हणाले, त्यांचे मी पहिल्यांदा आभार मानेल की त्यांच्या डोक्यात लख्ख प्रकाश पडला की कल्याण लोकसभेचे खासदार काम करतात.

खासदार डॉ. शिंदे यांच्यामुळे या सरकत्या जिन्याचे काम झालेले आहे, ते मनापासून काम करतात. शिवसेना पक्ष हा कधीच गट तट नव्हता. लोकांचे काम करण्यासाठी धावत जाणारा हा पक्ष आहे. आम्ही काम केलीत म्हणून लोकार्पण सोहळे करतो.

ठाकुर्ली येथील सरकता जिना हा तांत्रिक बिघाड झाल्याने तो सकाळी बंद होता. बिघाड दुरुस्त होताच तो सुरू झाला. शिवसेना कधीच कोणाच्या कामाच श्रेय घ्यायला जात नाही. शिवसेना सक्षम पक्ष असून मनसेला आता उपरती झाली आहे की खासदार काम करतात तर त्यांचे अभिनंदन.