डोंबिवली - डोंबिवली मधील स. ह. जोंधळे शाळेत एका शिक्षिकेने विद्यार्थ्यांना बेदम मारहाण केल्याचा आरोप मुलांच्या पालकांनी करत शुक्रवारी शाळेत गोंधळ घातला. गणित येत नसल्याने 5 व 6 वी च्या विद्यार्थ्यांना शिक्षकेने मारहाण केली.

याप्रकरणी मनविसेचे कार्यकर्ते व विष्णुनगर पोलिसांनी देखील शाळेत जात प्रशासनास जाब विचारला. शाळेच्या मुख्याध्यापिका मेनन यांनी सर्वांचे म्हणणे ऐकून घेत पालकांच्या तक्रारीनंतर शिक्षिकेवर कारवाई करण्यात येईल असे आश्वासन दिले.

डोंबिवली पश्चिमेतील स.ह.जोंधळे इंग्रजी माध्यमाच्या शाळेत गणिताच्या नीलम भारमल ह्या शिक्षिकेने पाचवी आणि सहावीच्या विद्यार्थ्यांना गणित येत नाही म्हणून बेदम मारहाण केल्याची घटना घडली. यामध्ये मुलांच्या मानेला, हाताला जबर मार लागला आहे.

मुलांना मारहाण केल्याने संतप्त पालकांनी शुक्रवारी शाळेत जात गोंधळ घातला. महाराष्ट्र नवनिर्माण विद्यार्थी सेनेच्या प्रतिक देशपांडे, प्रीतेश महामुणकर, यतिन पाकडगावकर, मयुरेश उतेकर यांनी देखील शाळेत जाऊन विचारणा केली. शाळेच्या मुख्याध्यापिका मेनन यांच्या कार्यालयात तीन तास ठिय्या मांडत सदर शिक्षिकेवर कारवाई करण्याची मागणी केली.

यावेळी सदर शिक्षिकेची कोणतीही कागदपत्रे शाळेत नसल्याची बाब उघडकीस आली. काही दिवसांपूर्वीच या शिक्षिकेची भरती झाली असून कोणतीही प्रक्रिया पार ना पाडता असे शिक्षक शाळेत भरती केल्याने पालकांनी संताप व्यक्त केला. शाळेतील गोंधळाची परिस्थिती पाहता विष्णुनगर पोलीस ठाण्याचे पोलिसांनी देखील शाळेत जाऊन परिस्थितीवर नियंत्रण ठेवण्यासाठी प्रयत्न केला.

याविषयी मनविसेचे उपशहर अध्यक्ष प्रतिक देशपांडे म्हणाले, शाळा प्रशासनाने ज्या पद्धतीने शिक्षकांची भरती करताना कोणत्याही प्रकारचे दस्तावेज न घेता भरती केलेली आहे. अशा शिक्षकांमुळे मुलांचा भविष्याचा प्रश्न ऐरणीवर आला आहे.

विद्यार्थ्यांना व्यवस्थित शिक्षक मिळावे यासाठी शाळा प्रशासनाने अधिकृतपणे जाहिरात देत शिक्षक पदासाठी योग्य असलेल्या शिक्षकांना भरती करावे अशी मागणी केली आहे. यावर शाळेच्या मुख्याध्यापकांनी पालकांच्या तक्रारीनंतर संबंधित शिक्षकावर कारवाई केली जाईल असे आश्वासन दिले.