डोंबिवली एमआयडीसीमध्ये एका केमिकल कंपनीत तीन स्फोट झाल्याची घटना घडली असून या स्फोटानंतर सगळीकडे एकच खळबळ उडाली आहे. या स्फोटानंतर तीन कंपन्यांना भीषण आग लागली असून आकाशात काळ्या धुराचे लोट पाहायला मिळत आहेत. ही आग आटोक्यात आणण्यासाठी शर्थीचे प्रयत्न सुरू आहेत. डोंबिवली अग्निशामक दलाचे बंब घटनास्थळी दाखल झाले आहेत.

दरम्यान या स्फोटात सुमारे १५ कामगार जखमी झाल्याची माहिती समोर आली आहे. हा स्फोट इतका भीषण होती की कंपनीच्या जवळपासच्या अनेक इमारतीच्या काचा फुटल्या, पत्रे उडाल्याची माहिती देखील समोर येत आहे. तसेच यामुळे कंपनीपासून सुमारे दीड किलोमीटर अंतरापर्यंतचा परिसर हादरून गेला.

यावेळी स्थानिकांनी टीव्ही९ मराठीशी बोलताना नेमकं काय घडलं याबद्दल माहिती दिली. त्यांनी सांगितलं की, मोठा आवाज आल्यानंतर सगळी कंपनी हादरून गेली, त्यानंतर सगळे कामगार काम सोडून बाहेर धावत आले. या स्फोटामुळे मोठं नुकसान झालं असल्याचे सांगितले.

कल्याण शहराचेचे काँग्रेस उपाध्यक्ष अजय खैरे यांनी टीव्ही९ मराठीशी बोलताना सांगितलं की, आग भयंकर असून एक ते दीडच्या सुमारास हा स्फोट झाला. घरातील बेड माझ्या गुडघ्यापर्यंत हवेत उडाला. घराच्या काचा फुटल्या तसेच स्लॅब देखील कोसळला. याआगोदर देखील एक-दोन वेळा असं झालं आहे. आतापर्यंत तीन-चार कंपन्यांमध्ये स्फोट झाला असल्याची प्रतिक्रिया त्यांनी दिली.

कशापद्धतीने आग आटोक्यात आणायची यासाठी प्रयत्न सुरू असून आपण एनडीआरएफला देखील पाचारण केलं असल्याचे उदय सामंत म्हणाले. तसेच तेथील काही सामाजिक संस्था देखील घटनास्थळी दाखल झाल्या आहेत. लवकरात लवकर आग आटोक्यात यावी यासाठी युद्ध पातळीवर काम सुरू असल्याचे देखील उदय सामंत यांनी सांगितलं. यासोबतच त्यांनी खासदार श्रीकांत शिंदे तसेच जिल्हाधीकारी देखील घटनास्थळी दाखल झाल्याची माहिती दिली.