डोंबिवली - डोंबिवली एमआयडीसी दुर्घटनेला चोवीस तास उलटले आहेत. भाऊ काम करतो, त्या कंपनीत स्फोट झालाय. शहरातील रुग्णालय पालथी घालत जखमींना पहात आहोत. परंतू भावाचा शोध लागत नाही. घटनास्थळी जाऊन पहाणी केली तेथेही लवकरच माहिती समजेल असे सांगितले जात आहे. दिवस जसजसा वर जातो मनाची चिंता वाढत आहे. भावाचा कोठेच शोध लागत नाही आहे असे म्हणताच त्यांच्या डोळ्यात टचकन पाणी आले. विवेक कुमार राजपूत हे आपल्या मोठ्या भावाचा शोध घेत असून त्यांच्या पदरी निराशा पडत असून जीव कासावीस होत आहे.

डोंबिवली एमआयडीसीत अमुदान कंपनीत झालेल्या स्फोटात 60 हून अधिक नागरिक जखमी झाले आहेत. तर 9 जणांचा मृत्यु झाल्याची माहिती समोर आली आहे. आजही अनेक कामगारांचे नातेवाईक आपल्या माणसांचा शोध घेत आहेत. रुग्णालयात जखमींमध्ये त्यांचे नाव नसल्याने घटनास्थळी जाऊन पुन्हा पुन्हा कुठे काही शोध लागतो याची चौकशी करत आहेत. काही नातेवाईक हताश झाले आहेत.

अमुदान कंपनी बरोबरच त्याच्या आजूबाजूला असलेल्या कंपन्या देखील आगीच्या कचाट्यात येऊन बेचिराख झाल्या आहेत. या कंपन्यांत काम करणारे कामगार, कर्मचारी यांचे नातेवाईक, जवळचे मित्र मंडळी त्यांचा शोध घेत तेथेच तळ ठोकून आहेत.

विवेक राजपूत हे देखील आपल्या मोठ्या भावाचा राकेश राजपूत याचा कालपासून शोध घेत आहेत. परंतू त्यांचा अद्याप तपास लागलेला नाही. राकेश हे गेल्या 10-12 वर्षापासून सप्तवर्ण कलर्स प्रायव्हेट लिमिटेड कंपनीत काम करत आहेत. या कंपनीत फॅब्रिक डायची निर्मिती केली जाते.

आग आटोक्यात आली आहे, शोधकार्य होऊन देखील काही तास उलटले आहेत. मात्र अजूनही राकेश यांचा कोठेच तपास लागलेला नाही. त्यामुळे राजपूत कुटूंबाची धाकधूक वाढली आहे. जसजशी वेळ पुढे सरकते तसतसे आपला माणूस सुखरुप असेल ना याची चिंता कुटूंबाला ग्रासते आहे.

राजपूत हे मुळचे उत्तराखंडचे कन्नौज गावातले आहेत. ते त्यांच्या कुटूंबासह सोनारपाडा गावात राहण्यास आहेत. राकेश काम करत असलेली कंपनी ही अमुदान कंपनीच्या समोरच असून या कंपनीला या आगीचा मोठा फटका बसला आहे. सप्तवर्ण कंपनी जळून पूर्ण बेचिराख झाली आहे. सध्या येथे कुलिंगचे काम सुरु असल्याचे अग्निशमन दलाचे जवान त्यांना सांगून लवकरच तुमच्या भावाची माहिती समजेल असा दिलासा देत आहेत असे विवेक यांनी सांगताच त्यांचे डोळे पाणावले.