मुंबई : शिवसेनेतून बंड करुन बाहेर पडलेले छगन भुजबळ, नारायण राणे आणि एकनाथ शिंदे यांच्याशी मनसे अध्यक्ष राज ठाकरे यांची तुलना केल्यानंतर "आपलं ते बंड नव्हतं", अशा शब्दांत मनसे अध्यक्ष राज ठाकरे यांनी प्रतिक्रिया दिली आहे. पण हे बंड नव्हतं तर काय प्रकार होता याबाबत त्यांनी झी २४ तासला दिलेल्या मुलाखतीत खुलासा केला. (Dont compare me with proShinde revolts of ShivSena Why did Raj Thackeray say that)

राज ठाकरे यांना प्रश्न विचारण्यात आला की, एकनाथ शिंदे ४० आमदारांना घेऊन शिवसेनेतून बाहेर पडले, पण हे पहिल्यांदाना घडलेलं नाही. यापूर्वी छगन भुजबळ, नारायण राणे आणि राज ठाकरे शिवसेनेतून बाहेर पडले. राज ठाकरेंचं हे बंड आणि एकनाथ शिंदे यांचं बंड यामध्ये काय फरक आहे? यावर राज ठाकरे म्हणाले, "मी बंड केलं नव्हतं. मी बाळासाहेबांना सांगून निघालो होतो. मी राजकीय स्वार्थासाठी दुसऱ्या कुठल्या पक्षात गेलो नाही. मी स्वतःचा पक्ष बाळासाहेबांना सांगून, भेटून मी बाहेर पडून स्थापन केला आहे. त्यामुळं यापूर्वी शिवसेनेत झालेल्या बंडाशी माझी तुलना होऊ शकत नाही"

शिवसेनेच्या बंडखोर चाळीस आमदारांना स्विकारणार का?

शिवसेनेतून बंड केलेले ४० आमदार हे माझ्याबरोबर काम केलेले हे माझे जुने सहकारी आहेत. त्यामुळं त्यांच्या गटाचा मनसेत विलिनिकरणाचा मुद्दा उपस्थित झाल्यास मी त्याचा नक्की विचार करेन. पण ही तांत्रिक बाब आहे जी मला माहिती नाही. पण माझ्यासाठी सर्वात आधी महाराष्ट्र सैनिक आहे, त्यांना यासाठी मी दुजाभाव देणार नाही, असंही यावेळी राज ठाकरे म्हणाले.