मुंबई - महाराष्ट्र दहशतवाद विरोधी पथकाकडून 64 कोटी 36 लाख रूपयाच्या अंमलीपदार्थ सोमवारी नष्ट केले. यावेळी केंद्रीय गृह अमित शाह यांच्या व्हर्चुअल उपस्थितीत ‘ड्रग्स ट्राफिकिंग अॅण्ड नॅशनल सिक्युरिटी’ या विषयावर दिल्ली येथे परिषदेचे आयोजन करण्यात आले होते.

सन 2023 मध्ये मागील 3 महिन्यामध्ये बृहन्मुंबई पोलीस दलातर्फे एकुण 4000 किलो इतक्या वजनाचा व 5000 कोटी किंमतीचा मुद्देमाल यशस्वीरित्या नाश केला आहे

या परिषदेच्या आयोजनादरम्यान अमित शाह यांनी व्हिडीओ कॉन्फरन्सींगद्वारे नष्ट करण्यात येणाऱ्या मालाचा आढावा घेतला. त्यावेळी राज्याच्या दहशतवाद विरोधी पथकाने विविध कारवायांमध्ये जप्त केलेला एकूण 161 किलो वजनाचे (अंदाजे 64 कोटी 36 लाख रूपये किंमतीचे अंमलीपदार्थ नवी मुंबईतील तळोजा येथील मुंबई वेस्ट मॅनेजमेंट कंपनीच्या बंदीस्त भट्टीमध्ये जाळून नष्ट करण्यात आले.

दहशतवाद विरोधी पथकाचे महासंचालक सदानंद दाते यांच्या मार्गदर्शनाखाली व विशेष पोलीस महानिरीक्षक अनिल कुंभारे यांच्या उपस्थित अंमली पदार्थ नाश समितीच्या अध्यक्षा पोलीस अधिक्षक (गुप्तवार्ता) शीला साईल, अंमली पदार्थ नष्ट करणाऱ्या समितीच्या सदस्यांच्या उपस्थितीत ही प्रक्रिया पूर्ण करण्यात आली.