खोपोली : बिल्डरांनी इमारती उभारताना पाण्याचा निचरा करण्यासाठी कोणतीही उपाययोजना केली नाही. तसेच, अनेक नैसर्गिक पाणी प्रवाह बंद केले. याचा परिणाम रहिवासी भागांत पाणी तुंबण्यात होत आहे. शनिवारपासून पडणाऱ्या या मुसळधार पावसामुळे अक्षरशः खोपोली जलमय झाले आहे.

नक्की वाचा : पॅसेजमध्येच रुग्णांना ऑक्सिजन; डोंबिवलीच्या शास्त्रीनगर रुग्णालयातील धक्कादायक प्रकार...

खोपोली शहरातील लौजी, डी. पी. रोड व उदयविहार परिसरातील सोसायट्यांमध्ये शनिवारपासून सुरू असलेल्या पावसामुळे पाणी शिरले. लौजी परिसरातील अनेक इमारतींमध्ये शेकडो रहिवासी राहत आहेत. तर अनेक टोलेजंग इमारतींचे आजही बांधकाम सुरू आहेत. भविष्यात येथील सांडपाण्याचा निचरा होण्यासाठी पालिका प्रशासन आणि विकासकाने कोणतीही उपाययोजना केलेली नाही. याशिवाय कोरोना महामारी सर्वत्र पसरत असल्याने नालेसफाईही या वर्षी करण्यात आली नाही. यामुळे दोन दिवसांपासून सुरू असलेल्या मुसळधार पावसामुळे लौजी येथील उदयविहार परिसरातील अनेक सखोल भागात व मोकळ्या जागेत पाणी तुंबले आहे. दरम्यान, सोमवारी स्थानिक नगरसेवक व नगरपालिका बांधकाम विभागाकडून जेसीबी लावून पाणी निचरा करण्यात आल्याने रहिवाशांना काहीसा दिलासा मिळाला आहे.

नक्की वाचा : दवाखाना नको रे बाबा! घरीच करतो तपासणी! ऑक्सिमीटर, थर्मामीटरसाठी सर्वाधिक गूगल सर्च

बिल्डरांनी इमारती उभ्या करताना नैसर्गिक प्रवाह बंद केले. काही ठिकाणी तर नाले बुजवण्यात आले आहेत. नगरपालिकेकडे या संदर्भात अनेक वेळा तक्रारी केल्या; मात्र कोणतीही कार्यवाही झालेली नाही.
- जयवंत माडपे, रहिवासी, लौजी 

ज्या भागात पाणी तुंबले, त्या ठिकाणी नगरपालिकेकडून तातडीने पाणी निचरा करण्यात येत आहे. कोरोना महामारीमुळे मनुष्यबळाची उपलब्धता कमी होत असल्याने कामे होण्यात अडचणी आहेत; मात्र बांधकाम विभागाला  तातडीने योग्य ती कार्यवाही करण्यास सांगितले आहे.
- सुमन औसरमल, नगराध्यक्ष, खोपोली

due to heavy rains the khopoli was flooded and the work of sanitation was not completed