वसई ः अवेळी पाऊस, तापमानात वाढ, अशा वातावरणातील बदलामुळे डोंगराळ आणि निर्जन ठिकाणी असणारे साप आता वसईच्या औद्योगिक आणि मानवी वस्तीत शिरकाव करू लागले आहेत. यामुळे नागरिकांच्या डोक्‍याला ताप झाला असून त्यांच्यात भीतीचे वातावरण निर्माण झाले असून, बचावासाठी सर्पमित्र अथवा अग्निशमन दलाला पाचारण केले जात आहे. 

वसई पूर्व भागात मोठ्या प्रमाणात औद्योगिक वसाहत आहे. वालीव फाटा, सातिवली, पेल्हार, भोईदापाडा, चिंचपाडा, वालीव, गोलानी या ठिकाणी विविध वस्तू तयार करणारे छोटे-मोठे कारखाने आहेत. तेथील गाळ्यांसह अडगळीच्या ठिकाणी साप लपून बसत आहेत, तर मालजी पाडा, चिंचोटी, नायगाव स्टार सिटी, वाकीपाडा, कामण, विरार, सोपारा फाटा यासह ग्रामीण व शहरी भागातील बैठी घरे, चाळी आणि गृहसंकुले आदी ठिकाणीदेखील भक्ष्याच्या शोधात ते येत आहेत.

घरात आणि कचऱ्याच्या ठिकाणी असणाऱ्या उंदराची शिकार साप करत आहेत. तापमानात झालेले बदल, पावसाची अवेळी हजेरी यामुळे हे साप बाहेर निघत आहेत. बऱ्याच जणांना सर्पदंशदेखील झाला असून उपचारासाठी वसई, कांदिवली, दहिसर या ठिकाणी जावे लागत आहे; मात्र महामार्गावर अशा घटना घडल्या, तर दंश झालेल्या व्यक्तीला रुग्णालयात नेण्यास बराच वेळ लागतो. त्यामुळे जवळच उपचारासाठी प्रशासनाने व्यवस्था करावी, अशी मागणी नागरिकांतून जोर धरू लागली आहे. 

घरी, कारखान्याचे गाळे या ठिकाणी मोठ्या प्रमाणात साप येत आहेत. रोजच ३ ते ४ ठिकाणाहून नागरिक मदतीसाठी संपर्क करतात. तेथे जाऊन साप पकडून नंतर त्यांना जंगलात सोडून देतो. महिन्याभरात ६० हून अधिक साप पकडले आहेत. सापाला नागरिकांनी मारू नये, तर सर्पमित्र अथवा महापालिकेशी संपर्क साधावा. 
संकेत पाटील, सर्पमित्र, वाकीपाडा