मुंबई : लॉकडाऊनमुळे "कुलाबा-वांद्रे-सीप्झ' मेट्रो 3 भूमिगत प्रकल्प स्थळी गर्दी होऊ नये यासाठी पाच टक्केच कामगार कार्यरत आहेत. त्यामुळे कामाचा वेग मंदावला आहे. 

"मेट्रो 3' प्रकल्पाच्या दोन बोगद्यांचे खोदकाम मुंबई मेट्रो रेल कॉर्पोरेशनतर्फे ( एमएमआरसी ) यशस्वीरित्या पूर्ण करण्यात आले. "कृष्णा 3' टीबीएम मशीनने पॅकेज 4 मधील सिद्धिविनायक मंदिर ते वरळी स्थानक हे 1.28 किमी अंतर खोदून पूर्ण केले गेले. गोदावरी 3 या टीबीएम मशीनने बहुचर्चित असा मिठी नदीखालील पहिला बोगदा 278 दिवसांत खोदून पूर्ण केला. मात्र कोरोना विषाणूच्या संसर्गामुळे लॉकडाऊन जाहीर करण्यात आल्यानंतर अडचण निर्माण झाली आहे. सरकारच्या नियमानुसार किमान 5 टक्के कर्मचारी वर्ग मेट्रो 3 प्रकल्प स्थळी काम करत आहे. परिणामी मेट्रोच्या भूमिगत प्रकल्पाचे काम धीम्या गतीने सुरू आहे. 

हे वाचलं का? : व्हिडीओ काॅन्फरन्सिंगद्वारे न्यायालयाचा विद्यार्थिनींना दिलासा

अत्यावश्‍यक व अनिवार्य कामेच सध्या करण्यात येत आहेत. नियम व सूचनांचे काटेकोरपणे पालन करण्यासाठी अभियंते, कर्मचारी कटिबद्ध आहेत, असे मुंबई मेट्रो रेल कॉर्पोरेशन तर्फे स्पष्ट करण्यात आले.

महत्त्वाचे ः कोरोनाच्या रुग्णांवर उपचार करणाऱ्या कर्मचाऱ्यांना मिळणार एक महिन्याचा जादा पगार

मिठी नदीखालील दुसरा बोगदा रखडला 
मेट्रो 3 च्या 33.5 किमीच्या भूमिगत मार्गातील पूर्ण झालेला हा 27 वा बोगदा आहे. या मार्गात एकूण 32 बोगदे असणार आहेत. जमिनीवर नदीचा प्रवाह असल्याने भूस्तराचा पोत ओळखून त्याप्रमाणे खोदकाम करणे जिकिरीचे होते. त्यामुळे नदीच्या प्रवाहाचा आणि दाबाचा विचार करून अद्ययावत तंत्रज्ञानाच्या मदतीने या बोगद्याचे काम पूर्ण करण्यात आले आहे. मिठी नदीखाली सुमारे 12.5 मीटर खोलीवर बोगद्याचे खोदकाम करण्यात आले आहे. या नदीखालील दुसऱ्या बोगद्याचे काम मार्चअखेरीस पूर्ण होणार होते. मात्र लॉकडाऊनमुळे ते काम रखडले आहे. या मार्गावरील आतापर्यंत 7.97 किलोमीटरचे कामे पूर्ण करण्यात आले आहे.