मालाड : कोरोना संकटामुळे फेरी बोटसेवा पुरवणाऱ्यांचा व्यवसाय पुर्ण ठप्प पडला आहे. त्यामुळे उदरनिर्वाहाचा मोठा प्रश्न आता त्यांच्यासमोर उभा ठाकला आहे. तसेच, यामुळे मच्छिविक्रेत्या महिलांनाही इतरत्र मासे विकण्यासाठी जाता येत नसल्याने त्यांच्यासमोरही आर्थिक संकट निर्माण झाले आहे. लाॅकडाऊनमुळे फेरी बोट सेवा पुरवणाऱ्या सहकारी संस्थांची दैनंदिन कमाई 40 ते 45 हजारांवरून थेट दोन हजारांवर आली आहे.  

कामगार आणि कष्टकऱ्यांनाही आता ऑनलाईन मार्गदर्शन; वाचा बातमी सविस्तर

कोरोनाचा प्रादुर्भाव रोखण्यासाठी मार्चच्या शेवटच्या आठवड्यात देशात लाॅकडाऊन लागू करण्यात आले. तेव्हापासून मनोरी-मार्वे व गोराई-बोरीवली फेरी बोटसेवा प्रवासी व पर्यटकांसाठी बंद करण्यात आली. सहकारी तत्त्वावर या दोन्ही  बोट सेवेचे मच्छिमार सहकारी संस्था संचालन करतात; मात्र लाॅकडाऊनमुळे दोन्ही संस्थांचे उत्पन्नच जवळपास बंद झाल आहे. सध्या फक्त आरोग्य कर्मचारी, पोलिस, पालिका कर्मचाऱ्यांसह अत्यावश्यक सेवा पुरवणाऱ्या कर्मचाऱ्यांसाठी बोट चालवली जात आहे. त्यातून नाममात्र उत्पन्न मिळत असल्याचे संस्थांचे म्हण्णे आहे. तसेच, ईधंन खर्च, कर्मचारी व इतर स्टाफचा मासिक पगार, बोटीच्या देखभालीचा खर्च यामुळे हातात काहीच उत्पन्न राहत नाही. तरीही आम्ही बोट सेवा बंद केली नसून अत्यावश्यक कर्मचाऱ्यांसाठी व रुग्णांसाठी फेरी बोट चालवत असल्याचे संस्थांनी सांगितले आहे. 

मोठी बातमी - भांडुप ते विक्रोळी मेट्रो रेल्वेने जोडणार? MMRDA ने मागवल्या निविदा

मच्छिविक्रेत्या महिलांनाही फटका
फेरी बोट बंद असल्याने गोराई गावातील मासेविक्रेत्यांचेही मोठे आर्थिक नुकसान झाले आहे. गेल्या चार महिन्यापासुन गावातील जवळपास 250 मासेविक्रेत्या महिलांना मासे विकण्यासाठी बोरीवलीला जाता आले नाही. त्यामुळे त्यांना आर्थिक भुर्दंड सहन करावा लागत आहे. 

50 टक्के कर्मचारी कपात
मनोरी-मार्वे फेरी बोट संस्थेकडे सध्या 34 कर्मचारी व प्रशासनिक स्टाफ आहे.  संस्थकडून कर्मचाऱ्यांना 50 टक्के पगार व शिधा दिले जात आहे. तसेच गोराई-बोरीवली फेरी बोट संस्थेकडे 40 कर्मचारी व स्टाफ आहेत. त्यातील 50 टक्के लोकांना कामातून कमी करण्यात आले आहे. दोन्ही संस्थांची दैनंदिन कमाई  40 ते 45 हजारावरून आता दोन हजारांवर आली आहे. 

कोरोनाचा फटका आमच्या संस्थेलाही बसला; मात्र मेरी टाइम बोर्ड आणि त्यांचे अधिकारी आम्हाला सहकार्य करत आहेत. मोठे आर्थिक नुकसान सहन करीत आम्ही आमचे कर्तव्य समजून अत्यावश्यक कर्मचाऱ्यांसाठी सेवा अविरत सुरु ठेवली आहे. सरकारने काही निर्बंध घालून व्यावसायिक आणि मासे विकणाऱ्या महिलांना परवानगी दिल्यास मोठी मदत होईल. 
- जोसेफ कोलासो, अध्यक्ष, गोराई मच्छीमार सहकारी संस्था

फेरी बोट सेवा पुरवण्यासाठी रोज जवळपास 35 हजारांचा खर्च येतो; मात्र आता उत्पन्नच जेमतेम  दोन-अडीच हजार होत असल्याने मोठा आर्थिक नुकसान होत आहे. लाॅकडाऊनमुळे संस्था चालवणेही कठिण होत आहे. 
- राॅकी कोळी, अध्यक्ष, मनोरी ग्रामस्थ मंडळ

------------------------------------------------------------------

संपादन - तुषार सोनवणे