मुंबई: मुंबईसह (Mumbai rain) ठाणे, अंबरनाथ, उरण, कर्जत, पनवेल (panvel) नवी मुंबई या पट्टयात मुसळधार पाऊस सुरु आहे. काल संध्याकाळी सुद्धा ढगांच्या गडगडाटासह मुसळधार पाऊस कोसळला होता. आजही तशाच पद्धतीने पाऊस सुरु आहे.

पावसामुळे आधीच ठाणे-पनवेल या ट्रान्स हार्बर मार्गावरील रेल्वे सेवा विस्कळीत झाली आहे. आता मध्य रेल्वे मार्ग पावसामुळे बाधित होण्याची शक्यता आहे. कर्जत ते कल्याण आणि कसारा ते कल्याण मार्गावर काही ठिकाणी ओव्हर हेड वायर मध्ये तांत्रिक अडचणी येत आहेत. कर्जत कल्याण आणि कसारा कल्याण मार्ग ०६:४० ते ०७:१५ वाजेपर्यंत बाधित झाले होते. आता ट्रेन पुन्हा या मार्गावर सुरू झाल्या आहेत.

या भागात विजांच्या कडकडाटासह मुसळधार पाऊस सुरू आहे. अजूनपर्यंत तरी पावसामुळे कुठे पाणी साचल्याचे वृत्त नाहीय. एक-दोन तासाच्या मुसळधार पावसाने मुंबापुरीची तुंबापुरी होत असल्याचा आतापर्यंतचा अनुभव आहे. पाणी साचल्यास रस्ते वाहतूक कोलमडून पडते. मध्य रेल्वेची वाहतुक विस्कळीत झाल्यास कामावरुन घरी परतणाऱ्यांचे हाल होऊ शकतात.