Nilam Gorhe: आझाद मैदानावर मेळावा हा लोकांना विकास होण्याच्या दृष्टीने स्फूर्ती देणारा कार्यक्रम असेल, असे मत विधान परिषदेच्या उपसभापती नीलम गोऱ्हे यांनी व्यक्त केले. ठाण्यातील टेंभी नाका येथील देवीचे गोऱ्हे यांनी शनिवारी दर्शन घेतले, त्या वेळी त्यांनी हे मत व्यक्त केले. त्यांच्यासोबत शिवसेना नेते मीना कांबळी, आमदार मनीषा कायंदे, माजी नगरसेविका तृष्णा विश्वासराव आदी उपस्थितीत होते.

राज्याचे मुख्यमंत्री एकनाथ शिंदे यांनी महिलांसाठी २२ विविध योजना जाहीर केल्या. या योजना केवळ जाहीर न करता, त्याची अंमलबजवानी करणारी सरकारी यंत्रणा सरकारच्या बरोबरीने उभी करण्याचा मुख्यमंत्री शिंदे यांचा निर्धार आहे.

माझ्या मते जिथे महिलांना धोका वाटतो तिथे वेळ पडल्यास महिलांना शस्त्राचे परवाने द्या, अशी भूमिका मी विधिमंडळात मांडली असल्याचे त्या म्हणाल्या. संजय राऊत आरोप करतात की, आमचा पक्ष अमली पदार्थाच्या बाजूने आहे का? पण माझा त्यांना सवाल आहे, की तुमच्याच पक्षातील तो ललित पाटील उबाठातून कधी बाहेर पडला? त्याच्यावर कधी कारवाई केली? तो तुमच्याच पक्षात आहे. त्याने कधी राजीनामा दिला? तो अटकेत आहे.

पण तुम्ही आम्हालाच उलटे प्रश्न करतात. असे खडे बोल त्यांनी सुनावले. नाना पटोले यांच्याबाबत विचारले असता, पटोले यांनी आधी हे स्पष्ट करावे की, त्यांनी कोणालाही विश्वासात न घेता विधानसभा अध्यक्षपदाचा राजीनामा का दिला? त्याचा पुढील राजकारणावर काय परिणाम झाला, हे सर्वांनी पाहिले आहे.