मुंबई : दिवाण हौसिंग फायनान्स लिमिटेडचा (डीएचएफएल) मुख्य व्यवस्थापकीय संचालक कपिल वाधवा याला सक्तवसुली संचालनालयाने (ईडी) सोमवारी अटक केली. दाऊद इब्राहीमचा हस्तक इक्‍बाल मिर्ची याच्या बेकायदा मालमत्तेप्रकरणी ही अटक करण्यात आली. न्यायालयाने वाधवान याला 29 जानेवारीपर्यंत ईडीची कोठडी सुनावली आहे.

हेही वाचा : रुग्णालयात नेण्यास दिरंगाई भोवली, दोघांना तुरुंगवास
 
इक्‍बाल मिर्ची व त्याच्या कुटुंबीयांच्या मुंबईत पाच मालमत्ता असल्याचे ईडीच्या तपासात निष्पन्न झाले आहे. त्यातील दोन मालमत्ता मेसर्स सनब्लिंक रिऍल्टर्स व मिलेनियम डेव्हलपर्स प्रा. लि. यांना विकण्यात आल्या आहेत. वरळीतील मालमत्ता 2011 मध्ये सनब्लिंक रिऍल्टर्सला विकण्यात आली होती. या व्यवहारात कपिल वाधवाने मनी लॉण्डरिंगसाठी आरोपीला मदत केल्याचा संशय असून ईडी अधिक तपास करत आहे. 

हेही वाचा : देवेंद्र फडणवीस दुर्दैवी गृहमंत्री; वाचा कोणी म्हणलं...

सिजय हाऊस ही 15 मजल्यांची इमारत मिर्ची व मिलेनियम डेव्हलपर्स यांनी 2007 मध्ये बांधली. या इमारतीच्या चौथ्या मजल्यावरील 14 हजार चौरस फुटांची मालमत्ता 2007 मध्ये मिर्चीच्या कुटुंबीयांच्या नावावर करण्यात आली. त्याशिवाय खंडाळ्यात सहा एकर जमीन मेसर्स व्हाईट वॉटर लि. यांच्या नावावर आहे. त्याचा ताबा मिर्चीच्या दोन मुलांकडे आहे. मुंबईतील साहिल बंगला मिर्चीची पत्नी व मुलाच्या नावावर आहे. वरळीतील समंदर महल येथील मालमत्ता मिर्चीची बहीण व मेहुण्याच्या ताब्यात आहे.

भायखळा येथील रोशन हाऊस चित्रपटगृह, क्रॉफर्ड मार्केट येथे तीन दुकाने, जुहू तारा रोड येथे मिनाज हॉटेल व पाचगणी येथील बंगला अशा इक्‍बाल मिर्चीच्या मालमत्तांची माहिती ईडीला मिळाली आहे. मुंबईतील या सर्व मालमत्तांची किंमत तब्बल 500 कोटी रुपये आहे.