राज्यात शिवसेना आणि भाजप नेत्यांमध्ये कलगीतुरा सुरु असतानाच केंद्रीय सूक्ष्म व लघुउद्योग मंत्री नारायण राणे यांनी मोठा गौप्यस्फोट केला आहे. नारायण राणेंनी थेट एकनाथ शिंदेंचे नाव घेत ते शिवसेनेत कंटाळले असून त्यांना लवकर आमच्यात घेऊ, असा गौप्यस्फोट राणे यांनी केला आहे. वसईत जनआशिर्वाद यात्रेमध्ये ते पत्रकारांशी बोलत होते. नारायण राणे यांच्या या वक्तव्यानंतर राजकीय वर्तुळात खळबळ माजली आहे.

जनआशीर्वाद यात्रेसाठी राणे शनिवारी पालघर जिल्ह्यामध्ये आले असता ते पत्रकारांशी बोलत होते. वसई-विरार-नालासोपारा भागात ही यात्रा काढण्यात आली आहे. वसई चिंचोटी येथे त्यांचे ढोल-ताशाचा गजर, आदिवासी तारपा नृत्याने त्यांचे स्वागत करण्यात आले. जनआशीर्वाद यात्रा आज दिवसभर पावसातच सुरू होती. जन आशीर्वाद यात्रेनिमित्ताने वसईत आलेल्या राणे यांनी मुख्यमंत्री उद्धव ठाकरे यांच्या कार्यपद्धतीवर टीका करतानाच पर्यटनमंत्री आदित्य ठाकरे यांची ‘चिरंजीव मंत्री’ म्हणून खिल्ली उडवली.

राणे यांच्या या वक्तव्यावर नंतर नगरविकास मंत्री एकनाथ शिंदे यांनी तुर्तास कोणतीही प्रतिक्रिया देण्यास नकार दिला. विधानसभा निवडणुकीनंतर एकनाथ शिंदे शिवसेनेवर नाराज असल्याच्या चर्चेला उधाण आलं होतं. ते भाजपमध्ये प्रवेश करणार असल्याच्या चर्चाही झाल्या होत्या. मात्र, शिवसेना-राष्ट्रवादी आणि काँग्रेस यांनी एकत्र येत सरकार स्थापन केलं. आता नरायण राणे यांच्या खांद्यावर बंदूक ठेवून भाजप शिवसेनेला शह देण्याचा प्रयत्न करत आहे. आगामी 10 महानगरपालिका निवडणुकीसाठी भाजपने जोरदार तयारी सुरु केली आहे.

एकनाथ शिंदेविषयी राणे काय म्हणाले?

नगरविकास मंत्री एकनाथ शिंदे यांच्याविषयी राणे म्हणाले की, शिंदे हे फक्त सहीपुरते मंत्री आहेत. सर्व अधिकार ‘मातोश्री’कडे आहेत. ते स्वतः अस्वस्थ आहेत आणि शिवसेनेला कंटाळले आहेत. मी त्यांना फोन करणार आहे. ते भाजपमध्ये आले तर आम्हाला आनंद वाटेल. आम्ही त्यांचे स्वागत करू.

गोमूत्र शिंपडण्यापेक्षा रोजगार द्या! -

‘‘राज्यात तीन लाख कामगार बेकार आहेत, साडेतीनशेच्या वर छोटेमोठे उद्येगधंदे बंद झाले आहेत, त्यामुळे गोमूत्र शिंपडण्यापेक्षा राज्यातील तरुणांना रोजगार द्या,’’ असा प्रहार नारायण राणे यांनी महाराष्ट्राचे मुख्यमंत्री उद्धव ठाकरे यांच्यावर केला.

मनसेशी युती झाल्यास आनंद

मनसे आणि भाजप यांच्यात युती झाली तर मला आनंदच होणार आहे. जिथे आघाडी होते, तिथे बिघाडी होते, असा राज्यातील महाविकास आघाडीला टोला मारत, आम्ही मनात आणले तर महाविकास आघाडीचे राज्यातील सरकार कधीही विसर्जित करू शकतो, असा इशारा राणे यांनी दिला.