मुंबई : अदाणी इलेक्ट्रिसिटीच्या दक्षता पथकाने अंधेरी पूर्व येथील प्लास्टिक मोल्डिंग व्यवसाय चालवणाऱ्या मेसर्स क्रोहास्ट प्लास्टिक मोल्डिंग मॅन्युफॅक्चरर लिमिटेडविरुद्ध १.०९ कोटी रुपयांच्या वीज चोरीचा गुन्हा नोंदविला आहे.

वीज कायदा २००३च्या कलम १३५ अंतर्गत गैररित्या थेट पुरवठा केल्याबाबतचे प्रकरण दाखल झाले आहे. याबाबत, पथकाने मोल्डिंग व्यवसायाचे मालक आणि अदाणी इलेक्ट्रिसिटी मुंबई लिमिटेडचे नोंदणीकृत ग्राहक असलेल्या पंकज वासुदेवन नायर यांच्याविरुद्ध खेरवाडी पोलिस स्टेशनमध्ये १५ जुलै रोजी तक्रार दाखल केली आहे.

मेसर्स क्रोहास्ट प्लास्टिक मोल्डिंग मॅन्युफॅक्चरर लिमिटेडविरुद्ध संशयास्पद हालचाली दक्षता पथकाच्या निदर्शनास सुरुवातीला आल्या.

परंतु त्यांना पुराव्यासह पकडण्यात यश आले नाही. त्यानंतर पथकाने यावेळी योग्य नियोजनासह १३ जुलै रोजी सदर स्थळी छापा टाकला आणि गैररित्या केलेल्या थेट पुरवठा प्रकरणाचा अखेर छडा लावला.

मेसर्स क्रोहास्ट प्लास्टिक मोल्डिंग कंपनीमध्ये संबंधित स्त्रोतातून तीन फेज थेट वीज पुरवठा जोडणी घेतली गेली आणि चेंजओव्हर स्विचपर्यंत ते विस्तारित करण्यात आले. ५८ किलोवॅटच्या लोडसाठी थेट पुरवठा घेतला जातो मात्र संबंधित ग्राहक मीटरचा पुरवठा थेट पुरवठ्याकडे वळवण्यासाठी चेंजओव्हर स्विच वापरत होता.

चार वर्षे आणि सात महिन्यांच्या कालावधीसाठी ५,६१,५९८ युनिटसाठी रु. १,०९,८२,५४४ इतक्या किमतीची वीजचोरी उघडकीस आली आहे.

वीजचोरी प्रकरणावर भाष्य करताना अदाणी इलेक्ट्रिसिटी मुंबई लिमिटेडचे प्रवक्ते म्हणाले, “सतर्कतेने महिनाभरात उघडकीस आणलेली चोरीची दुसरी मोठी घटना आहे. दक्षता पथकाने जून २०२३ मध्ये रु. १.३३ कोटीच्या वीज चोरीचे प्रकरण उघडकीस आणले होते.

कुरार गाव, मालाड येथे थ्री-फेज थेट पुरवठ्याद्वारे बेकायदेशीरपणे इलेक्ट्रोप्लेटिंगचा व्यवसाय करणाऱ्या जैनी ट्रेडर्सविरुद्ध कारवाई करण्यात आली होती. एवढ्या मोठ्या प्रमाणात वीजचोरी रोखल्याबद्दल आम्ही आमच्या पथकाचे अभिनंदन करतो.”