मुंबई : स्टेट ट्रान्सपोर्ट को आॅपरेटीव्ह बँकेच्या कर्मचाऱ्यांनी ५ सप्टेंबर पासून अघोषीत संप पुकारला आहे. परिणामी बँकेचे कार्यालयीन आणि आर्थिक कामकाजावर परिणाम झाला आहे. बँक प्रशासनाने कर्मचारी युनियन आणि कर्मचाऱ्यांना जाहिर नोटीस बजावल्या असून, कर्मचारी मात्र अद्याप कामावर रूजू झाले नसल्याने बँक कर्मचाऱ्यांच्या संपाचा तिढा वाढला आहे.

बँक कर्मचाऱ्यांकडून कोणत्याही प्रकारची नोटीस न देता संप पुकारल्याचा आरोप बँक प्रशासनाने केला आहे. त्यामूळे १४ सप्टेंबर रोजी एसटी प्रशासनाक़डून जाहीर नोटीस बजावण्यात आल्या आहे. बँकेच्या संचालक मंडळाकडून घेण्यात आलेले ठराव वादग्रस्त असून, बँकेच्या हिता विरूद्घ असल्याचा आरोप बँकेच्या कर्मचाऱ्यांकडून केला जात आहे.

या सर्व प्रकरणाचा तिढा सुटत नसल्याने एसटी कर्मचाऱ्यांच्या वेतनाचा प्रश्न उपस्थित झाला आहे. त्याशिवाय सभासद, ठेवीदारांमध्ये अस्वस्थता निर्माण झाली आहे. त्यामूळे या वादाचा तोडगा काढण्यासाठी आता राज्य सरकारक़डून दखल घेत येत्या आठव़ड्यात मंत्री उदय सामंत यांच्या उपस्थित बैठक बोलवण्यात येणार असल्याची शक्यता व्यक्त केली जात आहे.