मुंबई : दक्षिण मुंबईतील (South Mumbai) मोठा भाग २०५० पर्यंत पाण्याखाली जाण्याची भीती तज्ज्ञांकडून वेळोवेळी व्यक्त केली जात आहे. या इशाऱ्याची दखल पालिकेने (Municipal) घेतली आहे. मुंबईला (Mumbai) वाचविण्यासाठी आतापासूनच प्रयत्न करणे गरजेचे आहे, असे प्रतिपादन पालिका आयुक्त इक्बाल सिंह चहल (Iqbal Singh Chahal) यांनी शुक्रवारी केले.

मुंबई शहराचा पर्यावरण कृती आराखडा तयार होत आहे. असा आराखडा तयार करणारे मुंबई हे दक्षिण आशियातील पहिले शहर आहे, असे आयुक्तांनी सांगितले.

‘३१ वर्षांच्या सनदी सेवेत चक्रिवादळाचा फटका मुंबईला बसल्याचे मी पाहिले नव्हते. १२९ वर्षांनी चक्रिवादळ मुंबईच्या जवळ आले. तर, १५ महिन्यांच्या काळात तीन चक्रीवादळे मुंबई किनारपट्टीच्या जवळ आली. पाऊसही लहरी झाला आहे. महिन्याच्या सरीसरीचा पाऊस दोन चार दिवसांत कोसळतो. १९९० पासून वातावरणातील बदलाची चर्चा सुरू आहे. पण, आतापासून उपाययोजना आवश्यक असल्याचे ते म्हणाले. आगामी २५ ते ३० वर्षे धोकादायक आहेत. त्या दृष्टीने नियोजनाच्या गरजेवर त्यांनी भर दिला.