मुंबई : राज्याच्या विधिमंडळाच्या दोन्ही सभागृहांच्या सदस्यांसाठी आयोजित करण्यात आलेल्या युरोपीय देशांच्या अभ्यास दौऱ्यास अखेर केंद्र सरकारच्या परराष्ट्र खात्याची मान्यता मिळाली असून आज २२ आमदारांचे शिष्टमंडळ या दौऱ्यासाठी रवाना झाले. या दौऱ्याला परराष्ट्र खात्याची मान्यता नसल्याने तसेच आमदारांचे पुरेसे संख्याबळ नसल्याने या दौऱ्याबाबत प्रश्नचिन्ह निर्माण झाले होते. याबाबत ‘सकाळ’ ने २२ ऑगस्ट रोजी वृत्त दिले होते.

या अभ्यास दौऱ्यातील सदस्य २४ ऑगस्ट ते ४ सप्टेंबर या कालावधीत ३ युरोपीय देशांमध्ये प्रवास करणार आहेत. या अभ्यास दौऱ्यात सहा अभ्यासभेटी आणि बैठका होणार आहेत. अभ्यास दौऱ्यावरील शिष्टमंडळाचे नेतृत्व विधानपरिषदेच्या उपसभापती डॉ. नीलम गोऱ्हे करणार असून फ्रॅंन्कफर्ट (जर्मनी), ॲमस्टरडॅम (नेदरलँड) आणि लंडन (ब्रिटन) या शहरांना अभ्यास दौऱ्यावरील विधानसभा सदस्यांचे शिष्टमंडळ भेट देईल. या शिष्टमंडळात ११ महिला सदस्याही सहभागी झाल्या आहेत.

अभ्यास दौऱ्यात प्रारंभी फ्रॅंन्कफर्ट येथे सामाजिक, सांस्कृतिक तसेच कृषी आणि दुग्ध उत्पादन क्षेत्रांतील तज्ज्ञांबरोबर तसेच भारताच्या उच्चायुक्तांसमवेत बैठक होईल. ॲमस्टरडॅम येथे नेदरलॅंडच्या विविध क्षेत्रांतील तज्ज्ञांबरोबर चर्चा होईल.

लंडनमध्ये उच्चायुक्तांचीही भेट घेणार

त्याचप्रमाणे लंडन येथे देखील भारताचे लंडनमधील उच्चायुक्त, संयुक्त राष्ट्र महिला आणि हक्क समानता विचारमंच, लंडन, लंडनमधील मराठी मंडळाचे पदाधिकारी, ब्रिटनच्या संसदेतील राष्ट्रकुल संसदीय मंडळ मुख्यालय आणि महासचिव यांच्यासमवेत देखील यावेळी भेट होणार आहे.