कल्याण : कल्याण येथील शिवसेना उपशहर प्रमुख हर्षवर्धन पलांडे यांच्यावर काही अज्ञात लोकांनी तलावर आणि चॉपरनं हल्ला केल्याची धक्कादायक घटना समोर आली आहे. या घटनेनंतर शिवसेना पक्षप्रमुख उद्धव ठाकरे यांनी स्वतः पलांडे यांना फोन करुन त्यांची विचारपूस केली. तसेच आपण या घटनेचा वचपा नंतर घेऊ आता बरे व्हा, अशा शब्दांत त्यांना दिलासा दिला. (Fatal attack on Shiv Sena office bearer Harshwardhan Palande)

हल्ल्यात पलांडे यांच्या हाताला दुखापत झाली असून त्यांच्यावर खासगी रुग्णालयात उपचार सुरु आहेत. त्यांच्या दोन बोटांना गंभीर दुखापत झाली असून मारेकऱ्याचा हातातील चॉपर अडवताना ही दुखापत झाल्याचं त्यांनी सांगितलं. शिवसेनेनं काम कसं करतोस? असं म्हणत मारेकऱ्यांनी रॉड, चॉपर आणि तलावारीनं मारहाण केल्याचं पलांडे यांनी सांगितलं.

उद्धव ठाकरे आणि हवर्षवर्धन पलांडे यांच्यात फोनवरुन असा झाला संवाद

उद्धव ठाकरे - हॅलो!

पलांडे - जय महाराष्ट्र.

ठाकरे- कसा आहेस आता?

पलांडे - हल्ला केला माझ्यावर, तू शिवसेनेचं काम कसा करतोस? तेच बघतो असं ते म्हणाले.

ठाकरे - आता जास्त बोलू नका, बरे आहात ना? व्यवस्थित आहात ना?

पलांडे - वाचलो पळालो....काय करणार!!

ठाकरे - याचा वचपा आपण काढू नंतर....पहिलं व्यवस्थित व्हा.

पलांडे - आम्ही काही घाबरत नाही. आम्ही खंबीर आहोत, तुमच्यासोबत आहोत. काही टेन्शन नाही.

ठाकरे - मी पण येईन तिकडे

पलांडे - तुमचा आशीर्वाद राहू द्या फक्त आम्ही बघतो काय करायचं ते...जय महाराष्ट्र.