नालासोपाऱ्यात पार्किंगमधील वाहनांना बुधवारी (३१ जानेवारी) मध्यरात्रीच्या सुमारास अचानक आग लागल्याची घटना घडली. काही क्षणातच आगीने रौद्ररुप धारण केलं. यामध्ये ६ मालवाहू ट्रक देखील जळून खाक झाले. आगीची माहिती मिळताच अग्निशमन दलाच्या जवानांनी तातडीने घटनास्थळी धाव घेतली. आग विझवण्यासाठी प्रयत्न केले.

भीषण आगीच्या या घटनेत सुदैवाने कुठलीही जीवितहानी झालेली नाही. मात्र, मालवाहू ट्रक आणि गाड्या जळाल्यामुळे लाखो रुपयांचं नुकसान झालं आहे. घटनास्थळावरून मिळालेल्या माहितीनुसार, नालासोपाऱ्यातील पाकिंगमध्ये उभ्या असलेल्या एका मालवाहू ट्रकने अचानक पेट घेतला. या ट्रकमध्ये केमिकल असल्याने क्षणार्धात आगीचा भडका उडाला. काही क्षणातच आगीने रौद्ररुप धारण केलं. पार्किंगमध्ये उभ्या असलेल्या इतर वाहनेही यामध्ये पेटली. या आगीमुळे दूरपर्यंत धुराचे लोट पसरले होते.

स्थानिकांनी माहिती देताना सांगितले, आगीच्या भडक्याने एक ते दीड किलोमीटर मीटरच्या अंतरावरील घराच्या काचा फुटल्या. यामुळे परिसरात एकच खळबळ उडाली. स्थानिकांनी या घटनेची माहिती अग्निशमन दलाला दिली. आगीची माहिती मिळताच अग्निशमन दलाचे बंब घटनास्थळी दाखल झाले.

अथक प्रयत्नानंतर आग आटोक्यात आली. सुदैवाने यात कुठलीही जीवितहानी झाली नाही. मात्र, लाखो रुपयांचं नुकसान झालं आहे. आगीचे कारण अद्याप समजू शकलेलं नाही. वसई विरार महानगरपालिकेच्या अग्निशमन दलाच्या जवानांनी आगीवर नियंत्रण मिळवलं असून कुलींगचं काम सुरू आहे.