मुंबई : शिवसेनेचे मुंबईतील आमदार प्रकाश सुर्वे यांच्या कार्यालयाबाहेर स्फोटकांची गाडी सापडल्याची अफवा असल्याचं उघड झालं आहे. स्वांतत्र्यदिनाच्या पूर्वसंध्येला अशी स्फोटकांची गाडी सापडल्याची चर्चा सुरु झाल्याने मोठी खळबळ उडाली होती. पण पोलिसांच्या तपासानंतर त्या गाडीत फटाके असल्याचं समोर आल्यानं या चर्चेवर पडदा पडला.

मुंबई उपनगर येथील मागठाणेचे शिवसेनेचे आमदार प्रकाश सुर्वे यांच्या कार्यालयाबाहेर एक अज्ञात गाडी गेल्या चार पाच दिवसांपासून उभी होती. याबाबत माध्यमांशी बोलताना स्वतः आमदार सुर्वे यांनी सांगितलं होतं की, "माझ्या कार्यालयाबाहेर नुसती गाडी सापडली नाही तर स्फोटकांनी भरलेली गाडी सापडली आहे. उद्याच्या स्वातंत्र्यदिनाच्या पार्श्वभूमीवर घातपात घडवून आणण्यामागे कोणाचा हात आहे याची चौकशी व्हावी."

मात्र, याची माहिती मिळताच पोलीस पथक घटनास्थळी दाखल झालं आणि त्यांनी गाडीची कसून तपासणी केली. या तपासणीत या गाडीत फटाके आणि काही कागदी बॉक्समध्ये कचरा आणि भंगार असल्याचं निदर्शनास आलं. त्यामुळे आमदार प्रकाश सुर्वे यांच्या कार्यालयाबाहेर स्फोटकांची गाडी सापडली ही अफवा असल्याचं सिद्ध झालं.