अलिबाग : समुद्रातील वाढते प्रदूषण (Pollution is sea), बदलत्या वातावरणामुळे मासळी मिळण्याचे प्रमाण घटले आहे. दुसरीकडे मजूर, डिझेल आदींचे दरही (Diesel rate) वाढत असल्याने त्याचा परिणाम सुरमई, पापलेट, कोळंबी, बांगडा अशा मासळीचे भाव २०० रुपयांपासून ७०० रुपयांनी (Fish rate increases) वाढले आहेत. रायगड जिल्ह्यातील समुद्रात वेगवेगळ्या कंपन्यांचे सांडपाणी सोडले जाते. त्याचबरोबर जहाजांमधील तेळ गळतीमुळे मासळी उत्पादनावर परिणाम होत आहे.

गेल्या १५ फेब्रुवारीपासून केंद्र सरकारने डिझेलच्या दरात पेट्रोल पंपापेक्षा अधिक वाढ केली आहे. ९३ रुपयांना मिळणारे डिझेल १२० रुपयांना दिले जात आहे. या वाढत्या महागाईचा फटका मच्छीमारांना बसला आहे. १ मार्चपासून मासळीचे भाव वाढविण्यात आले आहेत. २०० ते ५५० रुपये किलोने मिळणारी मासळी ४०० ते १५०० रुपयांनी विकण्यात येत आहे.

अनेक दिवसांपासून डिझेलचे दर वाढवले आहेत. त्यात बदलत्या वातावरणामुळे मासळी मिळत नाही, त्यामुळे मासळीचे दर वाढले आहेत. सरकारने मासळीचा दुष्काळ जाहीर करावा, अशी मागणी केली आहे. तसेच वाढत्या डिझेलच्या दराबाबत लवकरच मच्छीमार संघाचे राज्याचे अध्यक्ष रामदास संदे यांच्या नेतृत्वाखाली केंद्रीय मंत्र्याची भेट घेऊन डिझेल वाढीचा प्रश्न मार्गी लावण्याचा प्रयत्न करण्यात येत आहे.

- विजय गिदी, संचालक, महाराष्ट्र राज्य मच्छीमार संघ.

कोरोनामुळे मच्छीमारांना फटका बसला आहे. त्यात चक्रीवादळ, कडक ऊन, थंडी अशा बदलत्या वातावरणामुळे मच्छीमार मोठ्या संकटात सापडले आहेत; परंतु सरकारमार्फत देण्यात येणारे मच्छीमार सोसायट्यांना दिले जाणारे डिझेल प्रचंड महाग झाले आहे. त्यामुळे मच्छीमारांसमोर मोठी समस्या निर्माण झाली आहे.
- सत्यजित पेरेकर, व्हाईस चेअरमन, मच्छीमार संस्था, अलिबाग.

मासळीचे भाव

मासळीचा प्रकार - १ मार्चचा भाव - आताचा भाव
सुरमई - ५५० - ८००
लहान पापलेट - ४०० - ८००
मोठा पापलेट - ८०० - १५००
बांगडा - २०० - ४००
कोलंबी - ३०० ते ४०० - ४०० ते ८००