मुंबईः गणेशोत्सव अवघ्या दोन दिवसांवर येऊन ठेपला आहे. मुंबईतल्या अंधेरीचा राजा गणपती मंडळाने एक अजब फतवा काढल्याने आश्चर्य व्यक्त होत आहे. कारण तुम्हाला बाप्पाच्या दर्शनासाठी जाताना ड्रेसकोड पाळावा लागणार आहे. त्याशिवाय दर्शन घेता येणार नाही.

19 तारखेला संपूर्ण देशभरात गणपती बाप्पाचं आगमन होणार आहे. सर्व मंडळांची गणपतीसाठीची तयारीदेखील जवळपास पूर्ण झाली आहे. अशातच आता मुंबईतील प्रसिद्ध अंधेरीचा राजा गणेशोत्सव मंडळानं गणेशभक्तांसाठी अजबच फतवा काढला आहे. या गणेशोत्सव मंडळानं बाप्पाच्या दर्शनाला येणाऱ्या गणेश भक्तांसाठी ड्रेसकोड ठेवला आहे. महिला आणि पुरूषांसाठी हा ड्रेसकोड लागू होणार आहे. 'साम टीव्ही'ने हे वृत्त दिले आहे.

अंधेरीचा राजा गणेश मंडळाच्या बैठकीमध्ये भक्तांची सुरक्षा आणि ड्रेसकोडबाबत चर्चा झाली होती. अखेर तो निर्णय घण्यात आलेला असून विशिष्ट ड्रेसकोड नसेल तर भक्तांना प्रवेश मिळणार नाही. मागील वर्षी देखील या निर्णयाची घोषणा झाल्यानंतर सामाजिक कार्यकर्त्या आणि भूमाता ब्रिगेडच्या अध्यक्ष तृप्ती देसाई यांनी मंडळाच्या निर्णयाला विरोध दर्शवला होता. मात्र मंडळाने अशा सर्व विरोधाला न जुमानता ड्रेस कोडचा नियम लागू केला. तसाच निर्णय यंदाही घेण्यात आलाय.

बाप्पाच्या दर्शनसाठी 'हे' कपडे चालणार नाहीत

लाडक्या बाप्पाच्या दर्शनासाठी महिलांनी शॉर्टस, स्कर्ट आणि पुरूषांनी हाफ पँट घालून आल्यास दर्शन घेता येणार नाही आहे. 14 वर्षावरील सर्वांनाच हा ड्रेस कोड बंधनकारक असणार आहे. असे माहितीफलक परिसरात डकवण्यात आलेले आहेत. मागच्या पंधरा वर्षांपासून ड्रेसकोडचा नियम असल्याचं सांगितलं जात आहे.