नवी मुंबई : वाशी खाडीमध्ये रविवारी दुपारी एका अज्ञात व्यक्तीचा मृतदेह तरंगताना आढळुन आला आहे. कुजलेल्या अवस्थेतील सदर मृतदेह पोलिसांनी स्थानिक मच्छिमार व अग्निशमन दलाच्या मदतीने बाहेर काढुन महापालिका रुग्णालयात पाठवुन दिला आहे. वाशी पोलिसांनी या प्रकरणी आकस्मात मृत्यूची नोंद करुन मृत व्यक्तीची ओळख पटविण्यासाठी प्रयत्न सुरु केले आहेत.

वाशी खाडीमध्ये रविवारी दुपारी 12 वाजण्याच्या सुमारास एका व्यक्तीचा मृतदेह तरंगत असल्याची माहिती वाशी पोलिसांना मिळाली होती. त्यानंतर पोलिसांनी वाशी खाडी पुलावर धाव घेऊन स्थानिक मच्छीमार व अग्निशमन दलाच्या मदतीने कुजलेल्या अवस्थेतील सदर व्यक्तीचा मृतदेह बाहेर काढला. त्यानंतर सदर मृतदेह वाशीतील महापालिकेच्या रुग्णालयात शवविच्छेदनासाठी पाठवुन दिला आहे.

वाशी खाडीत सापडलेला मृत व्यक्ती अंदाजे 40 ते 45 वयोगटातील असून त्याचे संपुर्ण शरीर कुजलेले आहे. सदर मृत व्यक्तीच्या अंगावर काळी पॅन्ट व अंगात शर्ट आहे. कुजलेल्या अवस्थेतील सदर व्यक्तीचा दोन ते तीन दिवसापूर्वी पाण्यात पडुन मृत्यू झाला असावा, अशी शक्यता पोलिसांकडून व्यक्त करण्यात येत आहे.

त्यामुळे आजुबाजुच्या परिसरातून बेपत्ता झालेल्या व्यक्तींची पोलिसांकडून माहिती घेण्यात येत आहे. वाशी खाडी पुलावरुन उडी टाकुन अनेक व्यक्ती आत्महत्या करत असतात, त्यामुळे या व्यक्तीने आत्महत्या केली आहे, कि तो पाण्यात पडला,

अथवा तो दुसरीकडुन कुठून वाहुन आला? याबाबत पोलिसांकडुन अधिक तपास करण्यात येत आहे. या व्यक्तीबाबत कुणाला काही माहिती असल्यास त्यांनी वाशी पोलीस ठाण्याशी संपर्क साधावा असे आवाहन करण्यात आले आहे.