मुंबई : पश्चिम बंगालमधील वीरभूम हत्याकांडातील (Birbhum Kiling case) चार संशयितांना सीबीआयने आज (ता. ७) मुंबईतून (Four suspected arrested) अटक केली. बाप्पा आणि शाबू शेख अशी चारपैकी दोन संशयितांची नावे आहेत. बंगालच्या वीरभूम येथील बोगतुई गावात २१ मार्च रोजी स्थानिक तृणमूल काँग्रेसचे नेते भादू शेख (Bhadu shaikh murder) यांची हत्या झाली होती. त्यानंतर झालेल्या हिंसाचारात आठ जणांना जिवंत जाळण्यात आले. या प्रकरणी राज्य सरकारने विशेष तपास पथकाचीही (Special investigation team) स्थापना केली होती.

पुढे कोलकाता उच्च न्यायालयाने हा तपास सीबीआयकडे सोपवला. हत्येनंतर लगेचच चार आरोपी बोगतुई येथून पळून गेले होते. त्यांचा शोधार्थ सीबीआयचे पथक मुंबईत आले होते. अखेर त्यांना गुरुवारी पहाटे मुंबईतून जेरबंद करण्यात आले. अटक करण्यात आलेल्या चार आरोपींपैकी बाप्पा आणि शाबू शेख अशी दोन व्यक्तींची नावे आहेत.

या दोघांची नावे हत्येप्रकरणी दाखल करण्यात आलेल्या एफआयआरमध्ये आहेत. चारही संशयितांना उद्या मुंबईतील न्यायालयात हजर करून पश्चिम बंगालला नेण्यासाठी ट्रान्झिट रिमांडची विनंती करणार आहोत, अशी माहिती सीबीआयच्या अधिकाऱ्याने दिली.