मुंबई: मुंबईत राहणारी दोन किशोरवयीन मुलं युथ एक्सचेंज कार्यक्रमातंर्गत (youth exchange programme) उद्या अमेरिकेला (America) जाणार आहेत. मालाड (Malad) येथे राहणारा अझीम शेख (१७) अमेरिकेतील मेरीलँड (Maryland) येथील एका कुटुंबासोबत राहणार आहे, तर गोरेगावमध्ये राहणारी रिया यादव (१६) टेक्सासला जाणार आहे. देशातील एकूण २८ शहरातून ९०० अर्ज आले होते. त्यातून युथ एक्सचेंज कार्यक्रमासाठी ४० मुलांची निवड झाली. त्यात मुंबईतून अझीम आणि रियाची निवड झालीय.

अमेरिकेत जाणाऱ्या मुलांमध्ये निवड होण्यासाठी त्यांना पाच टप्प्यांची कठोर प्रक्रिया पार करावी लागली. एएफएस आणि नवी दिल्लीतील अमेरिकन दूतावासाने युथ एक्सचेंज शिष्यवुत्ती आयोजित केली होती. ही परिक्षा उत्तीर्ण होण्यासाठी अझीम आणि रियाला लेखी परीक्षा, मुलाखत आणि इंग्लिश स्पीकिंग टेस्ट आणि ग्रुप डिस्कशन परीक्षेत उत्तीर्ण व्हावे लागले.

अमेरिकेत गेल्यानंतर तिथे या मुलांचे शिक्षण सुरु राहणार आहे. अझीम बारावीत असून विज्ञान शाखेचा विद्यार्थी आहे. मालवणी एमएचबी कॉलनी येथे तो राहतो. त्याचे वडिल टेक्निशिअन असून आई गृहिणी आहे. हे कुटुंब मूळचे नंदूरबारचे आहे.

रिया गोरेगावच्या मुरली उपाध्याय चाळीत राहते. ती पाटकर कॉलेजच्या FYJC-सायन्स शाखेत शिकत आहे. तिला डॉक्टर बनायचे आहे. तिचे वडिल सुरक्षा रक्षकाचे काम करतात. अत्यंत सामान्य घरातून येणारी ही दोन्ही मुले युथ एक्सचेंज कार्यक्रमातंर्गत भारताचे प्रतिनिधीत्व करणार आहेत.