एखाद्या गुन्हेगाराचा अंत्यंत वाईट पद्धतीने झाल्याच्या अनेक घटना आपण पाहातो. बऱ्याचदा गुन्हेगाराचे साथीदारच त्याचा काटा काढतात अशा घटना देखील आपण पाहतो. असाच काहीसा प्रकार एका गुन्हेगाराबाबत झाला आहे. हत्या आणि हत्येचा प्रयत्न अशा गंभीर गुन्ह्यात फरार असलेल्या एका आरोपीला चोरी करतानाच मृत्यूने गाठल्याचा प्रकार समोर आला आहे. अक्षय बाईत असे या आरोपीचे नाव असून तो विक्रोळी परिसरात राहतो.

मिळालेल्या माहितीनुसार, रविवारी पहाटे अक्षय हा विक्रोळी टागोरनगर परिसरातील मधुबन सोसायटीत चोरीच्या उद्देशाने शिरला होता. पण या वेळी चोरी करताना १४ व्या माळ्यावर अक्षयचा पाय घसरला आणि इमारतीवरून तो थेट खाली कोसळला. या दुर्घटनेत पडून त्याचा मृत्यू झाला. याबद्दलची माहिती विक्रोळी पोलिसांनी दिली आहे. अक्षयवर या पूर्वीच हत्या, हत्येचा प्रयत्न, चोरी यासारख्या गंभीर गुन्ह्यांची नोंद आहे.

हत्येचा व्हिडीओ झाला होता व्हायरल

दोनच दिवसांपूर्वी अक्षय आणि त्याच्या साथीदारांनी एका तरुणाला विवस्त्र करून त्याला मारहाण करत त्याची हत्या केली होती. या मारहाणीचा व्हिडिओ सोशल मिडियावर चांगलाच वायरल झाला होता. हत्येनंतर त्या व्यक्तीचा मृतदेह हा कसारा येथे टाकला होता. या गुन्ह्यात इतर आरोपींना अटक करण्यात आली होती. मात्र या गुन्ह्यात अक्षय हा फरार आरोपी होता. दरम्यान आज त्याचा चोरी करताना इमारतीच्या १४ व्या माळ्यावरून पडून मृत्यू झाला. या प्रकरणी विक्रोळी पोलिस ठाण्यात मृत्यू झाला असून पोलिसांनी अपमृत्यूची नोंद केली आहे.