GaneshUtsav2023: गणेशोत्सवासाठी कोकणात जाणाऱ्या गणेशभक्तांचा प्रवास सुरळीत व्हावा, यासाठी नवी मुंबई वाहतूक पोलिसांच्या वतीने विशेष उपाययोजना करण्यात आल्या आहेत. याच अनुषंगाने राष्ट्रीय महामार्ग क्रमांक ६६ वर अॅम्ब्युलन्स, क्रेन आदींसह वाहतूक शाखा, तसेच मुख्यालयातील ६५३ पोलिस कर्मचारी, ५७ अधिकारी, तसेच २५ वॉर्डन बंदोबस्तासाठी तैनात केले आहेत.

गणेशोत्सवासाठी कोकणात जाणाऱ्यांची संख्या अधिक आहे. त्यामुळे उत्सव साजरा करण्यासाठी जाणाऱ्या गणेशभक्तांना मुंबई-गोवा राष्ट्रीय महामार्गावरून जात असताना कुठल्याही प्रकारची अडचण येऊ नये, यासाठी पोलिस प्रशासनाने संबंधित सर्व यंत्रणेला तैनात केले आहे

. नवी मुंबई वाहतूक विभागाकडून वाशी, कळंबोली सर्कल, वेलकम हॉटेल, बांदल वाडीगाव-नवीन पनवेल, गणेश हॉटेल चिंचपाडा-नवीन पनवेल, गव्हाण फाटा वाहतूक शाखा चौकीसमोर पाच ठिकाणी सुविधा केंद्र उभारण्यात आली आहेत. या केंद्रांमध्ये वैद्यकीय सुविधा, अग्निशमन दलाचे मदतनीस, वाहन बंद पडल्यास मदतीकरिता मॅकेनिकल टीम, आपत्कालीन काळात संपर्क साधण्याकरिता वायरलेसची यंत्रणा, क्रेनची सुविधा उपलब्ध करून देण्यात आली आहे.

अवजड वाहनांना बंदी
वाहतुकीच्या नियोजन-नियमन करण्यासाठी १ पोलिस उपायुक्त, १ सहाय्यक पोलिस आयुक्त, १२ पोलिस निरीक्षक, ४३ सहाय्यक पोलिस निरीक्षक / पोलिस उपनिरीक्षक तसेच ६५३ पोलिस अंमलदार आणि २५ वॉर्डन असा पोलिस बंदोबस्त नेमण्यात आला आहे. तसेच गणेशोत्सव काळात वाहतूक कोंडी होऊ नये, यासाठी १६ ते २९ सप्टेंबर या कालावधीत मुंबई-गोवा या राष्ट्रीय महामार्ग क्रमांक ६६ वर १६ टन किंवा त्यापेक्षा जास्त वजन क्षमता असलेल्या अवजड वाहनांना बंदी घातली आहे.

गणेशोत्सवासाठी कोकणात जाणाऱ्या गणेशभक्तांचा प्रवास सुरळीत व्हावा, यासाठी नवी मुंबई वाहतूक पोलिसांच्या वतीने राष्ट्रीय महामार्ग क्रमांक ६६ वर विशेष उपाययोजना केल्या आहेत. नागरिकांनी वाहतुकीचे नियम पाळून गणेशोत्सव काळात सहकार्य करावे.
- तिरुपती काकडे, पोलिस उपायुक्त, नवी मुंबई वाहतूक विभाग