डोंबिवली - धुलीवंदनाच्या दिवशी सायंकाळी डोंबिवलीत दोन तरुणांना टोळक्याने बेदम मारहाण केल्याची घटना सातपुल परिसरात घडली आहे. डोक्यात बियरच्या बाटल्या फोडून तसेच रेल्वे रुळांवरील दगड फेकून मारत या तरुणांना मारहाण करण्यात आली आहे.

ओमकार माळी व अभिषेक भोईर या जखमी तरुणांवर डोंबिवलीतील शास्त्रीनगर रुग्णालयात उपचार सुरु आहेत. याप्रकरणी सचिन म्हात्रे, प्रथम भोईर, महेश चारसे, राम्या म्हात्रे, लाल्या म्हात्रे, सुसते आंबेकर यांसह सात ते आठ जणांविरोधात विष्णूनगर पोलिस ठाण्यात गुन्हा दाखल करण्यात आला आहे.

रेल्वे हद्दीत ही घटना घडल्याने हा गुन्हा डोंबिवली लोहमार्ग पोलिसांकडे वर्ग करण्यात आला आहे. दहशत पसरविण्याच्या उद्देशाने टोळक्याने हा हल्ला केल्याचे बोलले जात आहे. जखमी अभिषेक याने दिलेल्या तक्रारीनुसार डोंबिवली पश्चिमेत मोठागाव परिसरात राहणारा अभिषेक हा भिवंडी पडघा येथील एका खासगी गोडावून मध्ये काम करतो.

मंगळवारी दुपारी तो आपल्या मित्रांसोबत कामावर गेला होता. अभिषेक व ओमकार हे त्यांच्या मित्रांसोबत सायंकाळी 6 ते 6.30 च्या दरम्यान सातपुल परिसरातून डोंबिवलीकडे येत होते. रेल्वे ट्रॅकच्या मधोमध ते आले असता सात पूलाच्या रेल्वे बालकणीवर सचिन म्हात्रे, प्रथम, महेश राम्या, लाल्या, सुसते यासह सात ते आठ इसमांनी या तरुणांच्या जवळ येऊन शिविगाळ करण्यास सुरुवात केली. आम्हास शिवीगाळ का करता ?

असे दोघांनी त्यांना विचारले असता, राम्या व सचिन यांनी आम्हाला ओळखले नाही का ? आम्ही इथले भाई आहोत, येथे तडीपारी करुन बसलो असे सांगितले. यावर दोघांनी आम्हाला काय करायचे आहे तुमच्या गुन्हेगारीशी असे म्हणाले. याचा राग आल्याने त्यांनी रेल्वे ट्रॅकवर पडलेले दगड व त्यांच्या हातातील बियरच्या बाटल्या दोघांना फेकून मारण्यास सुरुवात केली.

त्यावेळी दोघे तरुण घाबरुन सैरावैरा पळू लागले. यातील अभिषेक व ओमकार हे त्या टोळक्याच्या हातात सापडल्याने त्यांनी सर्वांनी हाताच्या ठोश्या बुक्क्यांनी व लाथांनी दोघांना मारले. जवळ असलेल्या बियरच्या बाटल्या दोघांच्या डोक्यात फोडत त्यांना जखमी केले. जबर मारहाण केल्यानंतर टोळक तेथून निघून गेले.

ओमकार व अभिषेक याच्यासोबत असलेल्या मित्रांनी दोघांना उपचारासाठी शास्त्रीनगर रुग्णालयात उपचारासाठी दाखल केले. अभिषेक याच्या डोक्यास सात ते आठ टाके पडले असून ओमकार याच्या डोक्यात 27 ते 28 टाके पडले आहेत. तसेच त्यांच्या हातापायांनाही मार लागलेला आहे.

याप्रकरणी विष्णूनगर पोलिस ठाण्यात चौदा जणांविरोधात मंगळवारी रात्री गुन्हा दाखल करण्यात आला आहे. ही घटना रेल्वे हद्दीत घडली असल्याने डोंबिवली लोहमार्ग पोलिसांकडे हा गुन्हा वर्ग करण्यात आला आहे. याचा अधिक तपास सुरु असून याप्रकरणी अद्याप कोणालाही अटक करण्यात आलेली नाही.