घाटकोपर: मुंबईतील घाटकोपर परिसरात पश्चिमेला रामनगर (अ) येथील सिंहगड आणि सिंधुदुर्ग सहकारी गृहनिर्माण संस्थेच्या रहिवाशांनी रविवारी (1 ऑगस्ट) तीव्र आंदोलन केले. सकाळी 11 वाजण्याच्या सुमारास संक्रमण शिबिराबाहेर हक्काच्या घरांसाठी या लोकांनी आंदोलन करत आवाज उठवला. गेल्या 11 वर्षांपासून दोन सोसायट्यांच्या पुनर्बांधणीचे काम हाती घेण्यात आले आहे. पण त्यांना अद्याप घरे मिळालेली नाहीत. त्यासोबत दरम्यानच्या काळात त्यांना जेथे राहण्याची सोय करून दिली होती, त्या संक्रमण शिबिराचीही अवस्था आता वाईट झाली आहे. त्यामुळे संतप्त नागरिकांनी आपला रोष व्यक्त केला. (Ghatkopar people waiting for their houses from 11 years to redevelop agitating against govt)

सिंहगड सोसायटीत 187 तर सिंधुदुर्ग सोसायटीत 113 सदस्य राहत असून गेल्या 11 वर्षांपासून राहिवाशी संक्रमण शिबिरात राहत आहेत. गेल्या अनेक वर्षांपासून येथील SRA चे बांधकाम रखडले असल्याने रहिवाशी कमालीचे त्रस्त आहेत. तसेच राहत असलेल्या संक्रमण शिबिराची देखील दुरवस्था झाली आहे. "आमचे रखडलेले बांधकाम पूर्ण करा. आम्हाला आमचे हक्काचे घर द्या", अशी मागणी करत आज सिंहगड व सिंधुदुर्ग सहकारी गृहनिर्माण संस्थेतील सदस्यांनी एकत्रित येत आंदोलन केले.

शासनाने आमचे रखडलेले बांधकाम पूर्ण करावे. विकासक व एसआरए अधिकाऱ्याची तात्काळ बैठक घेऊन या प्रोजेक्टला गती द्यावी. अन्यथा मुख्यमंत्र्यांच्या दालनासमोर रहिवाशी तीव्र आंदोलन करतील.

- संस्थेचे अध्यक्ष प्रभाकर शेट्टी