मुंबई : मुंबईतील गोरेगाव परिसरात असलेल्या फिल्मसिटीमध्ये मालिकेच्या शुटींग दरम्यान सेटवर बिबट्या घुसल्याची घटना घडली आहे. बिबट्या सेटवर आल्यानंतर कलाकारांमध्यो मोठा गोंधळ उडाला. यावेळी त्याने एका कुत्र्यावर हल्ला केला असून कुत्र्याचा मृत्यू झाला आहे.

दरम्यान, फिल्मसिटीतील मालिकेच्या सेटवर सकाळी शूटिंग सुरू असताना बिबट्या घुसला. यावेळी सेटवर 200 हून अधिक लोक उपस्थित होते. पण बिबट्याला बघताच सेटवर मोठा गोंधळ उडाला असून कलाकारांना सुरक्षित स्थळी हलवण्यात आले आहे. पण या घटनेमुळे कलाकार चांगलेच घाबरले आहेत.

गोरेगाव येथील फिल्मसिटीच्या बाजूलाच आरे जंगल असल्यामुळे या ठिकाणी मोठ्या प्रमाणावर जंगली प्राण्यांचा अधिवास आहे. त्यामुळे येथील लोकवस्तीवरही अनेकदा बिबट्याने प्रवेश केल्याच्या घटना घडल्या आहेत. तर आरे वस्तीतील नागरिकांवरही हल्ला केल्याचे प्रकार समोर आले आहेत.