नवी मुंबई : पत्नीचा छळ व जातिवाचक शेरेबाजी केल्याप्रकरणी गुन्हा दाखल झाल्यानंतर अटक टाळण्यासाठी न्यायालयात(Court) धाव घेतलेल्या मनसेच्या (MNS) नवी मुंबई शहर अध्यक्ष गजानन काळे (Gajanan Kale) यांचा अटकपूर्व जामिनाचा अर्ज शनिवारी ठाणे जिल्हा सत्र न्यायालयाने (Thane District Court) फेटाळून लावला आहे. त्यांना अटक करण्यासाठी नवी मुंबई पोलिसांनी (Police) शोधमोहीम सुरू केली आहे.

गजानन काळे याच्याविरोधात शारीरिक व मानसिक छळ करून जातिवाचक शेरेबाजी केल्याची तक्रार पत्नी संजीवनी काळे यांनी गेल्या आठवड्यात नेरूळ पोलिस ठाण्यात दाखल केली आहे. त्या तक्रारीवरून पोलिसांनी छळवणुकीसह जातिवाचक शेरेबाजी करणे, मारहाण करणे आदी कलमांखाली गुन्हा दाखल केला आहे. त्यानंतर काळे फरार झाले असून गेल्या १० दिवसांपासून नवी मुंबई पोलिसांची वेगवेगळी पथके त्याचा शोध घेत आहेत; तर दुसरीकडे काळे यांनी अटक टाळण्यासाठी ठाणे जिल्हा सत्र न्यायालयात अटकपूर्व जामिनासाठी अर्ज दाखल केला होता. याप्रकरणी शनिवारी झालेल्या सुनावणीत सत्र न्यायालयाने अटकपूर्व जामीनअर्ज फेटाळून लावला.

• पोलिसांकडून जामिनाला विरोध

गजानन काळे यांच्यावर गंभीर स्वरूपाचा गुन्हा दाखल असल्याने, तसेच अटकपूर्व जामीन दिल्यास जातीय तेढ निर्माण होण्याची शक्यता गृहीत धरून, त्याचप्रमाणे संजीवनी काळे यांच्या जीवाला धोका होण्याची शक्यता असल्याने अटकपूर्व जामीन देण्यात येऊ नये, असे म्हणणे नवी मुंबई पोलिसांनी ठाणे जिल्हा सत्र न्यायालयात मांडले होते.

• संजीवनी यांची राज ठाकरेंकडे धाव

संजीवनी काळे यांनी आपल्या वडिलांसह मनसेप्रमुख राज ठाकरे यांची भेट घेण्यासाठी शनिवारी सकाळी कृष्णकुंजवर धाव घेतली, परंतु ठाकरे पुण्याच्या दौऱ्यावर असल्यामुळे त्यांनी शर्मिला ठाकरे यांची भेट घेऊन आपल्यावरील अन्यायाची त्यांना कल्पना दिला. तसेच आपल्याला व मुलाला धोका असल्याचे सांगून न्याय मिळावा, अशी मागणी केली. या वेळी शर्मिला ठाकरे यांनी याप्रकरणी राज ठाकरे यांना माहिती देऊन न्याय मिळवून देण्याचे आश्वासन दिले.