ठाणे : किनारपट्टीपासून दूर असलेल्या ठाणे जिल्ह्यातील (thane) ग्रामीण भागालाही मागील वर्षी ‘तौत्के’ या चक्रीवादळाचा (Tauktae cyclone) जोरदार तडाखा बसला होता. या वादळात जिल्ह्यातील झाडे, घरे व शाळांचीदेखील पडझड झाली होती. आता यातील शाळांच्या दुरुस्तीसाठी (Seventy School repairing work) सरकारकडून (Government) राज्य आपत्ती प्रतिसाद निधीच्या माध्यमातून निधी मंजूर झाला आहे. त्यात ७३ लाखांच्या निधीतून ७० शाळांची दुरुस्ती होणार असून, नुकसानग्रस्त शाळांना दिलासा मिळाला आहे.

मागील वर्षी १६ आणि १७ मे रोजी झालेल्या ‘तौत्के’ चक्रीवादळामुळे सागरी किनारपट्टी क्षेत्रातील परिसराला चांगलाच तडाखा बसला. या वादळात किनारपट्टी भागातील अनेक झाडांची व घरांची पडझड झाली होती. या वादळ पीडितांना सरकारी मदत प्राप्त झाली होती. त्याचबरोबर जिल्ह्यातील शहापूर, मुरबाड, कल्याण, अंबरनाथ आणि भिवंडी या भागातील जिल्हा परिषदांच्या ७० शाळांच्या इमारतींचेही वादळात मोठ्या प्रमाणात नुकसान झाले होते. या नुकसानग्रस्त शाळांची दुरुस्ती करण्यासाठीचा सविस्तर प्रस्ताव जिल्हा परिषदेच्या शिक्षण विभागाकडून शालेय शिक्षण विभागाकडे देण्यात आला होता.

शालेय शिक्षण विभागाकडून हा सविस्तर प्रस्ताव राज्य सरकारकडे प्राप्त झाला होता. या प्रस्तावानुसार जिल्हा परिषद प्राथमिक शाळांच्या इमारतींच्या तातडीच्या दुरुस्तीसाठी ७३ लाखांचा निधी मंजूर करण्यात आला आहे. हा निधी राज्य आपत्ती प्रतिसाद निधीच्या मार्गदर्शक तत्त्वानुसार विभागीय आयुक्तांमार्फत संबंधित जिल्हाधिकारी यांच्याकडे वितरित करण्यात आला आहे. त्यामुळे जिल्हा परिषदेच्या शाळांच्या दुरुस्तीचा मार्ग मोकळा झाला आहे.

सुसज्ज वर्गखोल्या मिळणार

जिल्ह्यातील अंबरनाथ, भिवंडी, कल्याण, शहापूर आणि मुरबाड या पाच तालुक्यांतील जिल्हा परिषद शाळांच्या २८८ वर्गखोल्यांपैकी ‘तौत्के’ चक्रीवादळाचा तडाखा ७० शाळांना बसला होता. या शाळेतील ११९ वर्गखोल्यांचे प्रचंड नुकसान झाले. आता, जिल्ह्यातील वर्गखोल्यांच्या दुरुस्तीसाठी निधी उपलब्ध झाल्याने विद्यार्थ्यांना अध्यापनासाठी सुसज्ज अशा वर्ग खोल्या मिळणार आहेत.

अपेक्षित खर्च धरून निधी

ठाणे जिल्ह्यातील नुकसानग्रस्त शाळांचे काही ठिकाणी पत्रे उडून गेले होते; तर काही शाळांच्या वर्गखोल्यांचे नुकसान झाले होते. या नुकसानग्रस्त शाळांच्या दुरुस्तीसाठी ७० हजारापासून ते एक लाखापर्यंतचा खर्च अपेक्षित धरला आहे. त्यानुसार ७० शाळांच्या दुरुस्तीसाठी ७३ लाखांचा निधी मंजूर करण्यात आला आहे.

तौत्के चक्रीवादळात शाळांच्या दुरुस्तीसाठी निधी मिळावा म्हणून सरकारकडे सविस्तर प्रस्ताव पाठविण्यात आला होता. तसेच त्याचा पाठपुरावादेखील करण्यात आला. आज या शाळांच्या दुरुस्तीसाठी निधी मंजूर करण्यात आल्याने शाळांच्या दुरुस्तीचा मार्ग मोकळा झाला आहे.
- सुभाष पवार, उपाध्यक्ष, जिल्हा परिषद ठाणे

शाळांचा आढावा

तालुके नुकसानग्रस्त शाळा संख्या
अंबरनाथ १५
भिवंडी १६
कल्याण ०५
शहापूर १४
मुरबाड २०