मोहिनी जाधव : सकाळ वृत्तसेवा

बदलापूर : हेंद्रेपाडा येथील पालिकेच्या जिमखान्यातील दुसऱ्या टप्प्याच्या प्रस्तावित कामासाठी अद्याप कोणतीही निविदा प्रक्रिया (Tender Procedure) काढण्यात आलेली नाही; मात्र तरीही केंद्रीय राज्यमंत्री कपिल पाटील (Kapil Patil) यांच्या उपस्थितीत भूमिपूजनाच्या कार्यक्रमाचा घाट घातला गेला. या कार्यक्रमावेळी पाटील यांच्या आगमनापूर्वी शिवसेनेच्या (shivsena) वतीने काळे झेंडे (black flags) दाखवून निषेध नोंदवण्यात आला. या वेळी निषेध करणाऱ्या शिवसैनिकांना बदलापूर पश्चिम पोलिसांनी ताब्यात घेतले.

बदलापूर पश्चिमेकडील हेंद्रेपाडा येथे जिमखान्याच्या दुसऱ्या टप्प्यातील कामाचे भूमिपूजन आज आयोजित करण्यात आले होते. प्रस्तावित कामाची अद्याप निविदा प्रक्रिया पूर्ण झालेली नाही. अद्याप हे काम कोणास मंजूर झालेले नसताना, तसेच शहरात प्रशासक असताना, एखाद्या राजकीय पक्षाच्या माध्यमातून हा नियमबाह्य कार्यक्रम कसा काय घेण्यात येतो, असा प्रश्न शिवसेनेकडून उपस्थित करण्यात आला.

मात्र या कार्यक्रमापूर्वी शिवसेनेचे शाखाप्रमुख भरत नवगिरे यांच्या नेतृत्वाखाली या कार्यक्रमाला काळे झेंडे दाखवून निषेध नोंदवण्यात आला; मात्र पाटील यांच्या उपस्थितीपूर्वी हा प्रकार घडला व ताबडतोब बदलापूर पश्चिम पोलिसांनी या निषेधकर्त्यांना ताब्यात घेतले. यानंतर कपिल पाटील यांच्या हस्ते भूमिपूजनाचा कार्यक्रम पार पडला.