मुंबई : कोरोना व्हायरसनं मुंबईत कहर माजवला आहे. दिवसेंदिवस रुग्णांच्या वाढत्या संख्येमुळं आरोग्य व्यवस्थेवरही प्रचंड ताण निर्माण झाला आहे. त्याच दरम्यान भाजपचे माजी खासदार किरीट सोमय्या यांनी ट्विट करुन एक धक्कादायक यादी जाहीर केली आहे. गेल्या काही दिवसांमध्ये मुंबईतल्या वेगवेगळ्या रुग्णालयांमधून कोरोनाबाधितांचे सहा मृतदेह गहाळ झाल्याचा दावा सोमय्यांनी केला आहे. या संदर्भात त्यांनी ट्विट देखील केलं आहे. 

आपली लोकल कधी सुरू होणार? राज्य सरकारने सुरू केले हे प्रयत्न! वाचा बातमी सविस्तर

किरीट सोमय्या यांनी या ट्विटमध्ये गहाळ झालेल्या मृतदेहांची नावासह माहिती सविस्तर देण्यात आलीय. इतकच काय तर, हे मृतदेह कोणकोणत्या रुग्णालयांतून गहाळ झाले याचीही माहिती दिली आहे. या माहितीच्या आधारावर सोमय्या यांनी आरोग्यमंत्री राजेश टोपे आणि गृहमंत्री अनिल देखमुख यांना एक पत्र देखील लिहिलं आहे. ज्या रुग्णांचे मृतदेह रुग्णालयातून गहाळ झालेत, त्यांच्या कुटुंबियांच्या मनःस्थितीचा विचार करुन सरकारनं योग्य ती कारवाई करण्याची मागणी सोमय्या यांनी पत्राद्वारे सरकारला केली आहे. 

गहाळ झालेल्या मृतदेहाच्या नावासह उल्लेख या पत्रात सोमय्या यांनी केला आहे. पत्रात लिहिलं की, केईएम रुग्णालयातून सुधाकर खाडे यांचा मृतदेह गहाळ झाला. घाटकोपरमधील राजावाडी रुग्णालयातून मेहराज शेख यांचा तर कांदिवली येथील शताब्दी रुग्णालयातून विठ्ठल मोरे यांचा मृतदेह गहाळ झाला जो बोरीवली रेल्वे स्थानकावर सापडला. नायर रुग्णालयातून मधुकर पवार यांचा तर जोगेश्वरी ट्रॉमा हॉस्पिटलमधून राकेश शर्मा यांचा मृतदेह गहाळ झालेत. तर, सायन येथील लोकमान्य टिळक रुग्णालयानं ग्यांतीदेवी विश्वकर्मा यांचा मृतदेह कुटुंबीयांकडं देण्याच्या आधीच त्यावर अंत्यसंस्कार केले, असा आरोप सोमय्या यांनी या पत्रात केला आहे. 

तसंच 'हे काय चाललं आहे,' असा प्रश्नही त्यांनी ट्विटरच्या माध्यमातून सरकारला केला आहे. या ट्विटमध्ये सोमय्या यांनी मुंबई महानगरपालिका, विरोधी पक्षनेते देवेंद्र फडणवीस, बीजेपी महाराष्ट्र, मुंबई पोलिस यांना टॅग केलं आहे.