मोखाडा : अतिदुर्गम मोखाडा तालुक्यातील दिव्यांगांना दिव्यांग प्रमाणपत्र मिळविण्यासाठी पालघर जिल्हा मुख्यालयाला जावे लागते. ही बाब दिव्यांगांसाठी खर्चिक आणि कसरतीची आहे. त्यामुळे मोखाड्यातील दिव्यांगांना तालुक्यातच दिव्यांग प्रमाणपत्र मिळावे म्हणून जिल्हा परिषद सदस्य प्रकाश निकम यांनी शल्यचिकित्सकांकडे पाठपुरावा केला होता.

त्याची दखल घेत मोखाड्यात बुधवार (ता. २७) व गुरुवार (ता. २८) दिव्यांगांना प्रमाणपत्र देण्यासाठी शिबिराचे आयोजन केल्याचे परिपत्रक जिल्हा शल्यचिकित्सक डॉ. अनिल थोरात यांनी प्रसिद्ध केले आहे. त्यामुळे आता मोखाड्यातील दिव्यांगांची प्रमाणपत्रासाठी फरपट थांबणार आहे. मोखाडा तालुक्यात एक हजारहून अधिक दिव्यांगांची संख्या आहे. सरकारी योजना तसेच सवलती मिळण्यासाठी दिव्यांग प्रमाणपत्र आवश्यक आहे. हे प्रमाणपत्र मिळविण्यासाठी मोखाड्यातील दिव्यांगांना पालघर जिल्हा मुख्यालयाला जावे लागते.

त्यामुळे दिव्यांगांना वेळ, पैसा, आणि शारीरिक त्रास सहन करत धडपड करावी लागत आहे. ही परवड थांबवण्यासाठी शिवसेनेचे पालघर जिल्हा परिषदेतील सदस्य प्रकाश निकम यांनी जिल्हा शल्यचिकित्सकांना निवेदन दिले होते. या निवेदनाद्वारे मोखाड्यात दिव्यांगांना प्रमाणपत्र देण्याची मागणी केली होती. निकम यांच्या मागणीची दखल घेत २७ व २८ ऑक्टोबरला मोखाडा ग्रामीण रुग्णालयात दिव्यांगांना प्रमाणपत्र देण्यासाठी दोन दिवस शिबिराचे आयोजन केले असल्याचे पत्रक जिल्हा शल्यचिकित्सक डॉ. अनिल थोरात यांनी निकम यांना पाठवले आहे. या शिबिरात डॉ. प्रशांत राजगुरू व डॉ. अजय देवघरे या अस्थिरोगतज्ज्ञांसह कर्मचारी उपस्थित राहणार आहेत.