मुंबई: अपंगांच्या डब्यातून प्रवास करणाऱ्या अपंग महिलेला धावत्या गुजरात एक्‍स्प्रेसमधून चोरट्यांनी बाहेर ढकलल्याची घटना शुक्रवारी (ता. 13) घडली. या घटनेनेमुळे महिलेला एक पाय गमवावा लागला असून, दुसऱ्या पायाला गंभीर दुखापत झाली आहे. या महिलेवर नायर रुग्णालयात शस्त्रक्रिया करण्यात आली असून सध्या तिची प्रकृती स्थिर असल्याचे सांगण्यात आले. 

महत्वाचं : मुंबईतील नागरिकांवर नव्या कर्जाचा बोजा

शुक्रवारी दुपारी अहमदाबादहून मुंबई सेंट्रलला येणाऱ्या गुजरात एक्‍स्प्रेसच्या अपंगांच्या डब्यातून नगमा अन्सारी नामक अपंग महिला प्रवास करत होती. दरम्यान, दादर स्थानक सोडल्यानंतर काही वेळात एक व्यक्ती अपंगांच्या डब्यात आली. त्याने दरवाजा आणि खिडक्‍या बंद करण्यास सुरुवात केली. अन्सारी यांना ही बाब खटकल्याने त्यांनी त्या व्यक्तीला विचारणा केली. त्या वेळी आम्ही प्लम्बर असून दुरुस्तीसाठी डब्यात चढल्याचे सांगितले. त्याच वेळी रेल्वेने थोडासा वेग वाढवल्यानंतर त्याने अन्सारी यांच्याकडे किमती वस्तूंची मागणी केली. त्यांनी मदतीसाठी आरडाओरडा करण्यास सुरुवात केल्यावर त्याने त्यांचे तोंड दाबून धरले आणि त्यांच्याकडील बॅग हिसकावली. बॅगमधील मोबाईल आणि रोकड काढून घेत मारहाण केली.

धक्कादायक ः त्याने घरातच केली गांज्याची शेती

आरोपी एवढ्यावरच न थांबता त्याने अन्सारी यांना ओढत दरवाज्याजवळ नेले आणि दादर ते मुंबई सेंट्रल स्थानकादरम्यान धावत्या एक्‍स्प्रेसमधून ढकलून दिले. परिणामी रेल्वे रुळांजवळ पडल्यामुळे अन्सारी यांना एक पाय गमवावा लागला आहे, तर दुसऱ्या पायाला गंभीर इजा झाली आहे. तसेच हातालाही मार लागला आहे. रेल्वे सुरक्षा दलाच्या जवानांनी अन्सारी यांना नायर रुग्णालयात दाखल केले. 

अन्सारी यांच्यावर शनिवारी शस्त्रक्रिया झाली असून आता त्यांची प्रकृती स्थिर आहे. रेल्वे सुरक्षा दल आणि रेल्वे पोलिसांचे पथक आरोपींचा शोध घेत आहे. 
- संभाजी कटारे, पोलिस निरीक्षक, मुंबई सेंट्रल जीआरपी