डोंबिवली : कल्याण ग्रामीण भागातील पिसवली गाव आणि आजूबाजूच्या परिसरात लोकसंख्या वाढत चालली आहे. येथिल नागरिकांना जवळपास आरोग्यकेंद्र नसल्याने त्यांना उपचारासाठी कल्याण पश्चिमेतील रुक्मिणीबाई रुग्णालय येथे जावे लागते. आपल्या गावात आणि परिसरात आरोग्यकेंद्र असावे यासाठी भाजपचे माजी उपमहापौर मोरेश्वर भोईर हे सातत्याने शासनाकडे पाठपुरावा करत होते.

भोईर यांच्या पाठपुराव्याला यश आले असून पिसवली ग्रामपंचायत कार्यालय येथे हे आरोग्य केंद्र लवकरच सुरू होत आहे. या केंद्राचे भूमिपूजन रविवारी भोईर यांच्या हस्ते पार पडले. आरोग्य केंद्राविषयी माहिती देताना भोईर म्हणाले, कल्याण डोंबिवली महानगपालिका यांच्या आरोग्य (वेलनेस) निधीतून येथे हे आरोग्यकेंद्र तयार करत आहोत. तसेच या परिसरात राहणाऱ्या सामान्य नागरिकांना उपचारासाठी लागणारा खर्च त्यांच्या क्षमतेपेक्षा जास्त असल्याने या पालिकेच्या आरोग्य केंद्राचा सामान्य नागरिकांना नक्कीच फायदा होईल.

दरम्यान येत्या 40 ते 50 दिवसात हे आरोग्यकेंद्र उभारले जाईल. पिसवली गाव तसेच आजूबाजूच्या परिसरात 70 हजारहून अधिक नागरिक वास्तव्य करत आहेत. त्यांना जवळपास कोणतेही शासकीय आरोग्य केंद्र नाही. हे केंद्र झाल्याने नागरिक, गरोदर महिला सर्वानाच याचा लाभ घेता येईल. महिना दीड महिन्यात हे केंद्र सुरू होईल असे ही भोईर यांनी सांगितले.